Pavlodarda jańa onkodıspanser merziminen buryn tapsyrylmaq
PAVLODAR. QazAqparat - Pavlodarda jańa onkodıspanser merziminen buryn iske qosylmaq. 227 oryndyq ortalyq pen aýysymyna 100 kelýshige arnalǵan emhananyń qurylysy 70% aıaqtaldy, dep habarlaıdy QazAqparat pavlodarnews.kz saıtyna silteme jasap.
Oblys ákimdigi baspasóz qyzmetiniń aqparatyna sáıkes, onkodıspanserdiń qurylysyna jeti mıllıard teńge bólindi.
«Búginde bul qarajatqa operatsııalyq-reanımatsııalyq, radıatsııalyq jáne patologoanatomııalyq korpýstar, 227 oryndyq statsıonar, aýysymyna 100 kelýshige arnalǵan emhana, baqylaý-ótkizý pýnkti, medıtsınalyq qaldyqtardy kádege jaratý pýnkti, bes avtomashınaǵa arnalǵan kólikjaı jáne jylýmen qamtamasyz etetin orynǵa úsh qazandyq ornatyldy. Qazirgi ýaqytta merdiger árleý jumystaryn júrgizip, aýmaqty abattandyrýǵa kiristi. Nysandy merdiger belgilengen merzimnen buryn tapsyrýdy kózdep otyr», - dep atap ótti óńirlik qurylys basqarmasy kúrdeli qurylys bóliminiń basshysy Abylaı Mushkenov.
Mamandardyń aıtýynsha, atalmysh jobany júzege asyrýdyń nátıjesinde kórsetiletin medıtsınalyq qyzmetterdiń sapasy jaqsarady, ólim-jitim kórsetkishteriniń tómendeýine, erte dıagnostıka kórsetkishteriniń artýyna, Pavlodar oblysynda onkologııalyq naýqastardy mamandandyrylǵan kómekpen qamtýǵa ákeledi.
«Medıtsınalyq qural-jabdyqtardy satyp alýǵa bıýdjetten 2,8 mıllıard teńge bólindi. Emhana bólimsheleriniń dárigerlik kabınetteri sáýlelik, ýltradybystyq jáne magnıtorezonanstyq mazmundaǵy qazirgi zamanǵy dıagnostıkalyq apparattarmen, sondaı-aq ekspress-dıagnostıka úshin bıologııalyq materıaldardy endoskopııalyq jáne analıtıkalyq zertteýlermen jabdyqtalady», - dep atap ótti qurylys basqarmasynda.
Aıta keterligi, statsıonardyń birinshi qabatynda klınıkalyq-dıagnostıkalyq zerthanalar, operatsııalyq-reanımatsııalyq korpýstyń ekinshi qabatynda bes beıindi operatsııalyq, úsh narkozdyq, tórt operatsııaaldy jáne eki apparattyq-monıtorly operatsııalyq bólimshe bolady. Úshinshi qabatta reanımatsııa jáne qarqyndy terapııa bólimshesi ornalasqan.
