Pavlodarda jańa óndiris paıda bolýy múmkin: sheteldik kompanııalarmen kelisim jasaldy
ASTANA. KAZINFORM — Nurlybek Nálibaev «Londian Wason» jáne «NAIKAN» kompanııalarynyń basshylarymen ınvestıtsııalyq yntymaqtastyq máselelerin talqylady, dep habarlaıdy Úkimettiń baspasóz qyzmeti.
Premer-mınıstrdiń birinshi orynbasary Nurlybek Nálibaev «Londian Wason New Energy Tech Inc.» kompanııasynyń bas dırektory Chjoý Gýanlınmen jáne «NAIKAN Ltd.» kompanııasynyń basshysy Aleksandr Nıgaımen kezdesý ótkizdi.
— Ónerkásip salasyndaǵy yntymaqtastyqty odan ári keńeıtý, ozyq sheteldik tehnologııalardy tartý jáne qosylǵan quny joǵary óndiristerdi qurý máseleleri talqylandy. Atap aıtqanda, taraptar qazaqstandyq katodty mysty negizge ala otyryp, mys folgasyn óndiretin zaýyt salý jobasyn qarastyrdy. Mys ónimderi akkýmýlıatorlar, energııa jınaqtaý júıeleri men zamanaýı mıkroelektrondyq jabdyqtar óndirisinde joǵary suranysqa ıe. Otandyq óndiristegi mys folgasyn Pavlodar oblysyndaǵy «Derekterdi óńdeý ortalyqtary alqaby» jobasy aıasynda paıdalanýǵa bolady, — delingen habarlamada.
Kelissóz barysynda otandyq katodty mysty paıdalaný, qazaqstandyq tehnıkalyq kadrlardy daıarlaý, óndiriletin ónimdi halyqaralyq naryqtarǵa shyǵarý máselelerine erekshe mán berildi.
Vıtse-premer Qazaqstan Úkimeti shıkizattyq modelden tereń óńdelgen ónim óndirýge kóshý baǵytyn qoldaıtynyn atap ótti.
Kezdesý qorytyndysy boıynsha «NAIKAN Ltd.» jáne «Londian Wason» kompanııalarynyń basshylary Qazaqstanda zaýyt salý jobasyn áriptestik negizde birlesip júzege asyrý týraly memorandýmǵa qol qoıdy.
Osydan buryn elde irimshik zaýyty salynyp, spýtnık óndirisi jolǵa qoıylýy múmkin ekenin jazdyq.
