Pavlodarda jańa ashylǵan mektepke Muzafar Álimbaevtyń esimi berildi
Pavlodar. QazAqparat – Jańa mektep «Zamanaýı mektep» baǵdarlamasy boıynsha salynyp, jabdyqtaldy. Oǵan Pavlodar oblysynyń ákimi Ábilqaıyr Sqaqov keldi, dep habarlaıdy QazAqparat oblys ákiminiń baspasóz qyzmetine silteme jasap.
«Zaton» shaǵyn aýdanynda mektep qurylysy 2019 jyly bastalǵan bolatyn. Nysan 2021 jyly tapsyrylýy kerek edi, biraq merziminen buryn oryndaldy. Sapasyna nuqsan kelgen joq - merdigerlerdiń jumysyn jaýapty organdarmen men ata-analar qaýymdastyǵy da qadaǵalady.
Jańa bilim oshaǵyna Muzafar Álimbaevtyń esimi berildi. Qazaqstan halyq jazýshysy, aqynnyń qurmetine mektepte shaǵyn mýzeı ashyldy.
«Ataqty jerlesimizdiń esimin mundaǵy oqýshylar men ustazdar qaıta jańǵyrtyp, mektep bıik jetisterge jetetinine senimdimin», - dedi óńir basshysy Ábilqaıyr Sqaqov onlaın rejıminde ótken mekteptiń ashylý saltanatynda.
600 oryndyq oqý ornynda barlyq kabınetter men rekreatsııalyq aımaqtar «Zamanaýı mektep» baǵdarlamasy boıynsha jabdyqtaldy. Ashanada «e-pit» júıesi ornatyldy, sonyń arqasynda mektep basshylyǵy tamaqtaný sapasyn baqylaıdy jáne oqýshylardan pikir qabyldaıdy. Sonymen qatar mektepte barlyq tanymal sport túrimen aınalysý úshin sport zaly tolyǵymen jabdyqtalǵan.
Ábilqaıyr Sqaqov bıyl «Zamanaýı mektep» baǵdarlamasy boıynsha jóndelgen Pavlodardyń úsh mektebine bardy. Innovatsııalyq tıptegi №34 mektepte ákim jańartylǵan kabınetterdi, sportzal men ashanany aralap shyqty. №28 mektepte óńir basshysyna joǵary synyp oqýshylaryna arnalǵan kabınetter men kitaphanany neǵurylym ashyq etip jasaý týraly sheshim qabyldanǵanyn aıtyldy. Y.Altynsarın atyndaǵy daryndy balalarǵa arnalǵan gımnazııa-ınternatynda Ábilqaıyr Sqaqovqa bıologııa, fızıka jáne hımııa boıynsha tájirıbelerge arnalǵan zerthana, sondaı-aq munda buryn ótkizilmegen tehnologııalyq sabaqtarǵa arnalǵan STEM-kabınet tanystyryldy.
Aýyldan kelgen oqýshylar turatyn mektep jataqhanalary da jóndeldi. Jalpy «Zamanaýı mektep» jobasy boıynsha bıyl Pavlodardyń alty mektep kúrdeli jóndeýden ótti. Baǵdarlamany iske asyrý kelesi jáne odan keıingi jyldary da jalǵasady.
