Pavlodarda jalǵan kottedjdi jalǵa berip kelgen alaıaq sottaldy
PAVLODAR. KAZINFORM - Óskemen qalasynyń 25 jastaǵy turǵyny №73 túzeý mekemesinde tergeýde otyryp, jalǵan kottedjderdi jalǵa berý arqyly adamdardy aldap kelgen.
Pavlodar qalalyq qylmystyq ister jónindegi aýdanaralyq sotynyń úkimine súıensek, aıyptalýshy 2025 jyldyń qańtar-shilde aılary aralyǵynda №73 mekemesinde bolǵan. Ol kolonııada otyryp, uıaly telefondy paıdalanǵan. Sol arqyly «Pavlodar men Buqtyrmada kottedjder jalǵa beriledi» degen jalǵan habarlandyrýlar jarııalaı bastaǵan.
- Áleýetti klıent habarlasqan ýaqytta ol úıdi jalǵa alý múmkindigi týraly kórineý jalǵan málimet bergen. Keıinnen klıentten úıdi jaldaý týraly oń jaýap alǵan soń, banktik shotqa aldyn ala tólem aýdarýdy talap etken. Túsken qarajatty jymqyryp, óz qajetine jaratyp otyrǵan, - delingen Pavlodar qalalyq qylmystyq ister jónindegi aýdanaralyq sotynyń úkiminde.
Alaıaqtyń qarmaǵyna túskender az emes. Іs qujattarynda 30 derek tirkelgen. Ol adamdardyń ańqaýlyǵyn paıdalanyp, 10, 25, 45 myń teńge kóleminde aldyn ala tólem alyp, artynan izin sýytyp otyrǵan. Osylaısha zańsyz jolmen 795 myń teńge tabys tapqan.
Sotta qylmystyq is alaıaqtyq deregi boıynsha qaraldy. Óskemendik azamattyń buǵan deıin de osy bap boıynsha, sondaı-aq urlyq pen tonaý derekteri úshin sottalǵany anyqtaldy. Jalǵan kottedjerdi jalǵa berý isinde ol óz kinásin moıyndaǵan joq.
Degenmen jınalǵan dáleldemeler aıyptaý úkimin shyǵarýǵa tolyq negiz boldy. Sot sheshimimen aıyptalýshyǵa 4 jylǵa bas bostandyǵynan aıyrý jazasy taǵaıyndaldy.
Aıta keterligi, sotta jábirlenýshilerdiń barlyǵy birdeı shyǵyndy óteý týraly azamattyq talap aryz túsirmegen. Sondyqtan sot sottalýshyny tek 110 myń teńge kólemindegi shyǵyndy óteýge mindettedi.
Eske sala keteıik, polıtsııa alaıaqtyqtyń jańa tásili shyqqanyn eskertti.
