Pavlodarda jalǵan habar bergen «telefon terrorısi» sottaldy
PAVLODAR. QazAqparat – Sot Pavlodar qalasynyń «telefon terrorısine» úkim shyǵardy, dep habarlaıdy QazAqparat tilshisi.
«Jarylǵysh zat qoıylǵany týraly jalǵan habar bergen Pavlodar qalasynyń turǵyny sot sheshimimen eki jylǵa bas bostandyǵyn shekteý jazasyna kesildi. Sondaı-aq májbúrli túrde bir jyl ishinde 100 saǵat eńbekke tartý jáne aıyppul salý jazasy taǵaıyndaldy. Jazasyn óteý kezinde er adamnyń turǵylyqty jerin aýystyrýyna, kóńil kóterý oryndaryna barýyna, tıisti organdarǵa habarlamaı basqa jerlerge barýǵa quqyǵy joq, sondaı-aq nashaqorlyqtan emdeý kýrsynan ótýi tıis », - dep habarlady Pavlodar oblysy polıtsııa departamentiniń baspasóz qyzmeti.
Eske sala keteıik, 16 qyrkúıekte Pavlodar turǵyny akademık Marǵulan kóshesiniń №118 úıiniń kireberisinde terrorızm aktisi bolǵany týraly habarlaǵan.
«Oqıǵa ornyna polıtsııa men jedel qyzmetter jiberildi. Tekserý kezinde fakt rastalmady, bul habarlama jalǵan bolyp shyqty. Jedel-izdestirý barysynda quqyq qorǵaý organdarynyń qyzmetkerleri buryn sottalǵan 36 jastaǵy oblys ortalyǵynyń turǵynyn ustady. Ol mas kúıinde uıaly telefonynan 112 operatorynyń pýltine qońyraý shalyp, terrorlyq áreketti kórip otyrǵanyn aıtqan», - dedi departamenttegiler.
Bul fakti boıynsha QR QK 273-baby boıynsha sotqa deıingi tergeý júrgizildi.
