Pavlodarda jalǵan alkogoldik ishimdik daıyndaýshylar 12 jylǵa sottalmaq
ASTANA. QazAqparat - Pavlodar oblysynda zańsyz alkogol ónimderiniń aınalymymen aınalysqan uıymdasqan qylmystyq top múshelerin 12 jylǵa deıin bas bostandyǵynan aıyrý jazasy kútip tur, dep habarlaıdy «QazAqparat» HAA tilshisi oblys prokýratýrysynyń bapasóz qyzmetine silteme jasap.
Uıymdasqan qylmystyq top quramyna 5 adam kiredi, olardyń tórteýi - áıelder. Tórteýine qatysty «qamaýǵa alý» túrindegi bultartpaý sharasy qoldanyldy. Olar Kenjekól jáne Pavlodarda jalǵan alkogol ónimderin ázirleıtin jasyryn tsehtar uıymdastyrǵan. Qajetti shıkizat ónimderi (spırt, bótelke, japsyrma jáne taǵy basqalary) kóbinese ShQO-dan alynǵan. Tsehta olardy bótelkelerge quıyp, eseptik-baqylaý markalaryn jabystyryp, daıyn ónimderdi Pavlodar oblysyna (Beıbitshilik kóshesi, 50) jáne oblys aýmaǵyna taratqan.
Óndiris kólemi kúnine shamamen 2 000 bótelke alkogol ónimderin quraıdy, olardyń basym bóligi «Novaıa» markasynyń araqtary. Kúdiktilerdiń áreketteri QR QK-iniń 262-bap 1,2 tarmaǵy (qylmystyq top qurý jáne oǵan basshylyq jasaý), 233-bap 2-tarmaq (jalǵan eseptik-baqylaý markalaryn paıdalaný) 214-bólim 2-tarmaq (zańsyz kásipkerlik), 218-bólim 3-tarmaq (qylmystyq jolmen alynǵan múlkin zańdastyrý) boıynsha anyqtaldy.
Atalǵan baptar boıynsha múligin tárkileı otyryp, 12 jylǵa deıin bas bostandyǵynan aıyrý jazasy taǵaıyndalatyndyǵy qarastyrylǵan.
