Pavlodarda jaǵajaılar resmı túrde 3 maýsymnan ashylady
PAVLODAR. KAZINFORM - Mamandar arnaıy jabdyqtalǵan jaǵajaılarda ǵana sýǵa túsý kerektigin eskertip otyr. Arnaıy ruqsaty joq oryndarda shomylǵan azamattarǵa 7 aılyq eseptik kórsetkish mólsherinde aıyppul salynýy yqtımal.
Pavlodar qalasynda sýǵa túsý maýsymy 3 maýsymnan resmı túrde ashylady. Qaladaǵy 6 jaǵajaı tynyǵýshylardy qabyldaýǵa daıyn.
Bul týraly Pavlodar qalasy ákiminiń baspasóz qyzmetinen habarlady.
«Tótenshe jaǵdaılar departamentiniń mamandary shahardaǵy jaǵajaılardy súzip shyǵyp, olardyń qaýipsiz ekenin rastady. Soǵan oraı bıyl jaǵajaılar jumystaryn jyldaǵydan erte bastaıdy. Sáýir aıynan beri qalalyq jaǵajaılardy abattandyrý boıynsha daıyndyq jumystary júrgizildi. Kúnnen qorǵaıtyn qurylǵylar, pırster men terrassa taqtalaryn, jataqtar men qutqarý munaralaryn qalpyna keltirý jáne jóndeý, sý qubyrlaryn, aýyzsýǵa arnalǵan sýburqaqtardy, sheshinetin oryndardy, dýshtar men balalarǵa arnalǵan bólek aımaqtar, býılardy ornatý jumystary júrgizilip bolyp qaldy. Bir ǵana Ortalyq jaǵajaıda 1500 aǵash sáki, 12 dýsh jáne 8 aýyzsý surburqaǵy ornatylǵan. Al balalarǵa arnalǵan qoǵamdyq basseın 1 maýsymnan iske kiristi. Qyzmeti ádettegideı tegin. Kún saıyn saǵat 9.00-20.00 aralyǵynda jumys isteıdi. Ár dúısenbi – tazalyq kúni, jabyq bolady. Ortalyq jáne Ýsolka jaǵajaılarynda 18 beınebaqylaý kamerasy ornatylǵan, olar tótenshe jaǵdaı departamentiniń qutqarý stansalaryna qosylǵan», - dep málimdedi qalalyq ákimdikten.
Al oblystyń ózge qalalary men aýdandaryndaǵy jaǵajaılarda ázirshe ruqsat berilgen joq. Máselen, Baıanaýyl aýdanyndaǵy «Jasybaı» demalys aımaǵynda týrıstik maýsymnyń resmı ashylýy 14 maýsymǵa josparlanǵan.
Óńirlik tótenshe jaǵdaılar departamenti azamattyq qorǵanys basqarmasynyń ofıtseri, kapıtan Temirlan Japalbaıdyń aıtýynsha, oblystaǵy 47 jaǵajaıdyń nebári 13-i ǵana arnaıy tekserýden ótken.
- Jergilikti atqarýshy organdar tarapynan túsken hattamaǵa sáıkes, bizdiń departament mamandary men atqarýshy organ ókilderi engen arnaıy top árbir jaǵajaıdaǵy sý túbin zerdelep, ol jerdegi tıisti jabdyqtardyń bolýyna kóz jetkizedi. Qazirgi kúni 19 hattama túsip, 13 hattama boıynsha tekserý júrgizildi. Biz óz tarapymyzdan sheshimderimizdi aıtamyz. Al jaǵajaıdyń resmı túrde jumys isteı bastaýyna atqarýshy organdar ruqsat beredi,-deıdi departament ókili.
Elimiz boıynsha 1 maýsymnan bastap jazǵy sýǵa túsý kezeńi ashyq dep jarııalanǵanymen, bul jerde óńirlerdegi klımattyq jaǵdaı eskeriledi. Máselen, Pavlodardaǵy Ertis ózeni kóktemde tasyp, arnasy keńeıip ketetini belgili. Sýǵa túsý maýsymyn ashý úshin ózenniń jazǵy arnasyna qaıtyp oralýyn kútý qajet. Mamandar ózen arnasy endi ǵana arnasyna túskenin, soǵan oraı jaǵajaılardy tekserý, jabdyqtaý jumystary bastalǵanyn aıtady.
- Byltyr oblysta 8 adam sýǵa ketip, qaza boldy. Mundaı qaıǵyly jaǵdaıǵa urynbaý úshin azamattardy sýǵa túskende saq bolýyn eskertemiz. Ásirese, jabdyqtalmaǵan oryndarda sýǵa túspeý kerek. Mysal úshin Pavlodarda 6 jaǵajaı bar bolsa, onyń 4-i – kommýnaldyq. Kópshilik atalǵan jerlerde ǵana shomylǵany durys. Áıtpegende QR Ákimshilik quqyq buzýshylyq týraly kodekstiń 412-babyna sáıkes, jeke tulǵalarǵa 7 aılyq eseptik kórsetkish mólsherinde aıyppul salynady. Joǵaryda barlyq jaǵajaılar daıyn emes dedim ǵoı. Tolyq jabdyqtalmaǵan, ashylýyna ázirshe ruqsat berilmegen jaǵajaılarda sýǵa túskenderge de osyndaı ákimshilik jaza qarastyrylǵan,-deıdi Temirlan Japalbaı.
Oblys ortalyǵyndaǵy jaǵajaılarda tynyǵýshylardyń qaýipsizdigin «Elekor» JShS-niń 16 qutqarýshysy qamtamasyz etedi. Al oblys boıynsha tótenshe jaǵdaılar departamentiniń jedel qutqarý jasaǵynan bólek, jaǵajaılarǵa qyzmet kórsetetin mekemeler men fırmalardyń qutqarýshylary bar. Olar «nusqaýshy» dep atalady. Departament olardy arnaıy oqytyp, ruqsat qaǵazyn beredi. Bıyl 64 nusqaýshyny oqytýǵa ótinim túsken.
Buǵan deıin bıyl jazda Pavlodar oblysynda 47 jaǵajaı jumys isteıtini týraly jazǵanbyz.