Pavlodarda jaǵajaı fýtbolynan Qazaqstan sýperkýbogy men kýbogy oıyndary ótedi
PAVLODAR. KAZINFORM - 2026 jylǵy 28-31 mamyr aralyǵynda Pavlodar qalasynda jaǵajaı fýtbolynan maýsymnyń basty respýblıkalyq jarystary ótip, onyń aıasynda eki birdeı ulttyq júlde sarapqa salynady, dep habarlaıdy Qazaqstan fýtbol federatsııasynyń baspasóz qyzmeti.
Jarys baǵdarlamasynyń shymyldyǵyn Qazaqstan Respýblıkasynyń Sýperkýbogy jolyndaǵy matchtar serııasy ashady. Bul tıtýl úshin elimizdiń qazirgi chempıony ári Kýbok ıegeri pavlodarlyq «Arman» men Qazaqstan Kýbogynyń ótken utysynyń kúmis júldegeri – Jetisý oblysynyń «Malaısary» komandasy baq synaıdy.
Reglamentke sáıkes, jeńimpaz eki jeńiske deıingi serııa qorytyndysy boıynsha anyqtalady. Eger alǵashqy eki matchta qarsylastar bir-birden jeńiske jetse, úshinshi sheshýshi kezdesýdi ótkizý qarastyrylǵan.
Sýperkýbok básekesi aıaqtalǵannan keıin birden Qazaqstan Respýblıkasy Kýbogynyń utysy bastalady. Toptyq kezeńde qatysýshylar eki topqa bólingen. «A» tobynda Semeıdiń «Spartak» ujymy, elordalyq «Arlan» jáne «Malaısary» óner kórsetse, «V» tobyna pavlodarlyq «Arman» men qatar Pavlodar oblysynyń namysyn qorǵaıtyn «TK V&A» jáne «Zarya Arystan» ujymdary endi.
Týrnırlerdiń barlyq matchtary Pavlodar qalasynyń Ortalyq jaǵalaýynda ornalasqan arnaıy stadıonda ótedi. Qazaqstan fýtbol federatsııasy óziniń resmı YouTube-arnasynda oıyndardyń tikeleı translıatsııasyn uıymdastyrady.
Oıyndar kestesi:
28 mamyr (beısenbi)
Qazaqstan Sýperkýbogy
11:00 «Arman» – «Malaısary»
18:00 «Malaısary» – «Arman»
29 mamyr (juma)
09:00 «Arman» – «Malaısary» (qajet bolǵan jaǵdaıda)
29 mamyr (juma)
Qazaqstan Kýbogy
10:00 «TK V&A» – «Zarya Arystan»
11:00 «Spartak» – «Arlan»
17:00 «Arman» – «Zarya Arystan»
18:00 «Spartak» – «Malaısary»
30 mamyr (senbi)
10:00 «Arman» – «TK V&A»
11:00 «Arlan» – «Malaısary»
17:00 1 «A» – 2 «V» (Jartylaı fınal)
18:00 1 «V» – 2 «A» (Jartylaı fınal)
31 mamyr (jeksenbi)
10:00 5-6 oryndar úshin match
11:00 3-4 oryndar úshin match
16:00 Fınal
Osyǵan deıin Qazaqstan Premer-lıgasynda HІІ týr oıyndary bastalatyny týraly jazdyq.
