Pavlodarda jábirlenýshilerge «samsýngtyń syılyǵyn» ýáde etken alaıaq ustaldy
ASTANA. QazAqparat - Pavlodarda polıtsııa qyzmetkerleri uıaly telefon arqyly alaıaqtyq jasaǵan 33 jastaǵy er adamdy ustady, dep habarlaıdy «QazAqparat» HAA tilshisi Pavlodar oblysynyń ІІD baspasóz qyzmetine silteme jasap.
Vedomstvonyń habarlaýynsha, alaıaqtyń jábirlenýshilerdi aldaý shemasy birdeı bolǵan. Naqtyraq aıtqanda, oblys turǵyndarynyń uıaly telefondaryna «Samsýng» kompanııasynyń arnaıy syılyǵyna ıe bolǵany týraly SMS-habarlamalar kelip túsken. Odan keıin «Zaharov Alekseı Nıkolaevıch» dep ózin tanystyrǵan er adam SMS-habarlama túsken kisilerge qońyraý shalyp, qymbat teledıdar utyp alǵany týraly «ertegi» aıtyp bergen. Biraq, syılyqqa ıe bolý úshin ol óziniń nómirine mindetti túrde 2000 teńge salýdy suraıdy. Sonymen birge, osy jolmen alaıaq jábirlenýshilerge taǵy birneshe nómirge aqsha saldyrǵan.
Mundaı súıinshi jańalyqty estigen adamdar elektrondy júıe arqyly álgi adamǵa 25 500 teńge salyp berip, taqyrǵa otyrǵanyn ózderi de sezbeı qalsa kerek. Álbette, «syılyqtan» qur alaqan qalǵan jábirlenýshiler polıtsııaǵa júginipti.
Vedomstvonyń habarlaýynsha, kóp uzamaı kúdikti qolǵa túsken. Qazirgi ýaqytta ustalǵan alaıaqqa qatysty QR Qylmystyq kodeskiniń 190-baby boıynsha qylmystyq is qozǵalyp, tergeý amaldary júrgizilip jatyr.
«Quqyq qorǵaýshylar óńir turǵyndaryna mundaı alaıaqtyqtan saq bolýǵa shaqyrady. Ár túrli alaıaqtardyń jemi bolmas úshin beıtanys adamdar qońyraý shalǵanda abaı bolǵan abzal. «Siz uttyńyz» dep, aqsha suraıtyndar alaıaqtar ekenin este saqtańyzdar», - dep eskertedi ІІD-niń baspasóz qyzmeti.
