Pavlodarda zeınetkerlerdi arbaýyna túsirgen dropperler anyqtalyp, jaýapqa tartyldy
ASTANA. KAZINFORM – Pavlodardaǵy bank bólimshesinde bolǵan jarylysqa qatysty tergeý barysynda buǵan deıingi ınternet alaıaqtyǵy isine qatysy bar dropperler anyqtalyp, jaýapkershilikke tartyldy. Bul týraly Pavlodar qalasy Polıtsııa basqarmasy Ońtústik polıtsııa bóliminiń bastyǵynyń orynbasary Sultan Rysbaev Jibek Joly telearnasynyń «Búgin Live» baǵdarlamasynda aıtty.
Eske salaıyq, Pavlodarda telefon alaıaqtarynyń arbaýyna túsken zeınetker erli-zaıypty bank bólimshesine torttyń ishine jasyrylǵan pırotehnıkalyq buıymdy aparyp, jarylys bolǵan. Keıin olardyń jalǵan ınvestıtsııalyq jobaǵa aqsha salyp, alaıaqtarǵa aldanyp qalǵany anyqtaldy.
Artynsha qaskóıler qaıta habarlasyp, «aqshańyzdy qaıtaryp beremiz» degen jeleýmen psıhologııalyq qysym jasap, osy áreketke ıtermelegen. Qazir osy derek boıynsha birneshe qylmystyq is boıynsha tergeý júrgizilip jatyr.
Sultan Rysbaevtyń aıtýynsha, qazir kúdiktilerdi anyqtaý jáne ustaý baǵytyndaǵy jedel-izdestirý sharalary jalǵasyp jatyr.
– Qazirgi ýaqytta atalǵan is boıynsha sotqa deıingi tergeý júrgizilip jatyr. Kúdiktilerdi anyqtaý jáne ustaý maqsatynda jedel-izdestirý is-sharalary jalǵasyp jatyr. Tergeý múddesine baılanysty qylmystyq istiń ózge mán-jaıy jarııa etilmeıdi, – dedi ol.
Polıtsııa ókiliniń sózinshe, tergeý barysynda buryn tirkelgen ınternet alaıaqtyǵy faktisi boıynsha dropper retinde áreket etken adamdar anyqtalǵan.
– Olar zań aıasynda jaýapkershilikke tartyldy. Sonymen qatar sot tártibimen jábirlenýshilerdiń urlanǵan qarajatyn qaıtarý baǵytynda tıisti sharalar qabyldanyp jatyr, – dedi Sultan Rysbaev.
Ol azamattardy alaıaqtardyń jańa aılasyna aldanyp qalmaýǵa shaqyrdy.
– Bir ret alaıaqtarǵa aldanǵan adamdarǵa qaıta habarlasyp, «aqshańyzdy qaıtaryp beremiz» nemese «ótemaqy rásimdep beremiz» degen usynystar aıtylsa, bul – alaıaqtyqtyń jalǵasy. Sondyqtan kúmándi qońyraýdy birden toqtatyp, eshqandaı nusqaýdy oryndamaı, jaqyndaryńyzben aqyldasyp, dereý polıtsııaǵa habarlasý qajet, – dedi polıtsııa ókili.
Eske salaıyq, buǵan deıin Qazaqstanda zeınetkerlerdi ınternet alaıaqtarynan qorǵaý maqsatynda olardyń atyna onlaın nesıe rásimdeýge tyıym salynǵany habarlanǵan bolatyn.
