Pavlodarda zeınetkerge shabýyl jasaǵan er adam qolǵa tústi
PAVLODAR. KAZINFORM - Oqıǵa oblys ortalyǵyndaǵy saýda úıleriniń birinde bolǵan. Polıtsııa kúdiktini qolǵa túsirip, ákimshilik jaýapkershilikke tartty.

Pavlodardaǵy «Alataý» saýda úıiniń ishinde 1958 jyly týǵan áıelge er adam shabýyl jasaǵan.
Kýágerlerdiń aıtýynsha, er adamnyń qolynda sýyq qarý bolǵan. Oqıǵa búgin tańerteńgilik, kópshiliktiń kózinshe órbigen.
- Polıtsııa qyzmetkerleri zeınetkerge shabýyl jasaǵan er adamdy ustady. Mán-jaıdy anyqtap jatyr. Ustalǵan azamatqa qatysty usaq buzaqylyq baby boıynsha ákimshilik is qozǵalyp, materıal toltyryldy. Ol ári qaraı sotqa jiberiledi. Er adamnan eshqandaı sýyq qarý tabylǵan joq, - dep habarlady óńirlik polıtsııa departamentiniń baspasóz qyzmetinen.
Eske sala keteıik, Pavlodardaǵy dúkende arandatýshylyq jasaǵan áıel jaýapqa tartylyp, isi sotqa jiberildi.