Pavlodarda zergerlik dúken qyzmetkeri 1,7 kg astam altyndy lombardqa ótkizgen
PAVLODAR. KAZINFORM — Pavlodar qalasynyń turǵyny, týǵan ápkesiniń zergerlik salonynda jumys istegen áıel qumar oıyndarǵa áýestenip, soǵan aqsha tabý úshin áshekeı buıymdardy alyp, lombardtarǵa ótkize bastaǵan, dep habarlaıdy Kazinform tilshisi.
Pavlodar qalasynyń qylmystyq ister jónindegi aýdanaralyq sotynyń úkiminde áıeldiń 2017 jyly ápkesiniń zergerlik salonyna jumysqa turǵany kórsetilgen. Ol satýshy-keńesshi retinde adal eńbek etip, materıaldyq jaýapty tulǵa bolǵan. 2023 jylǵa qaraı qyzmetker qumar oıyndarǵa áýestene bastaǵan.
— 2022 jyldyń qarasha aıynyń basynda ol uıaly telefon arqyly «Nomad kazıno» qosymshasynda tirkelip, slot oıyndaryn oınaı bastaǵan. Oıynǵa aqsha qajet bolǵandyqtan, osy kezde ol altyn buıymdardy, atap aıtqanda saqınalar, syrǵalar men tizbekterdi urlaý týraly sheshim qabyldaǵan. Jumys ornynda ol buıymdardyń bırkalaryn sheship alyp, keıin lombardqa baryp ótkizgen. Túsken qarajatty bank kartasyna aýdaryp otyrǵan. Odan ári ol onlaın-kazınoda júıeli túrde oınap, aqshasyn utylyp qalyp, jumys ýaqytynda qaıtadan altyn buıymdardy urlaýdy jalǵastyrǵan, — delingen Pavlodar qalasynyń qylmystyq ister jónindegi aýdanaralyq sotynyń úkiminde.
Tergeý nusqasy boıynsha, pavlodarlyq áıel birneshe aı boıy dúkennen áshekeılerdi urlap otyrǵan, jalpy keltirilgen shyǵyn 164 mln teńgege jetken. Barlyǵy onyń ápkesi túgendeý júrgize bastaǵanda áshkere bolǵan.
Sot is materıaldaryn zerttep, taraptardy tyńdaı kele, áıeldiń kinási dáleldengenin anyqtady. 37 jastaǵy pavlodarlyq áıel jalpy salmaǵy 1,7 kılogramnan asatyn áshekeı buıymdardy urlaǵan. Úkim boıynsha oǵan 7 jyl bas bostandyǵynan aıyrý jazasy taǵaıyndaldy, alaıda jaza 2 jylǵa, uly 14 jasqa tolǵanǵa deıin keıinge shegerildi. Aıta keteıik, zergerlik salon ıesi qylmystyq protseste materıaldyq shyǵyndy óndirýdi talap etpegen.
Eske salaıyq, buǵan deıin Pavlodarda Qorǵanys isteri departamentiniń burynǵy bastyǵyna qatysty tekserý bastalǵanyn jazdyq.