Pavlodarda zańsyz salynǵan avtokólik jýý beketi úsh aıdyń ishinde turǵyn úıge aınalýy tıis
ASTANA. QazAqparat - Pavlodarda oblystyq jerdiń paıdalanylýy men qorǵalýyn baqylaý basqarmasynyń mamandary zańsyz paıdalanyp jatqan jerler boıynsha reıd jasady, dep habarlaıdy pavlodarnews.kz.
Qujat boıynsha turǵyn úı bolýy kerek Lomov jáne 1 Maı kósheleriniń qıylysynda avtojýý beketi ornalasqan.
- Ózderińiz kórip turǵandaı, kásipker oǵan berilgen jerdi maqsatty túrde qoldanbaǵan. Atalmysh avtojýý beketiniń dırektory ákimshilik jazaǵa tartyldy. Eger ol úsh aı ishinde qatelikti durystamasa nemese paıdalanýǵa alǵan jerdiń baǵytyn ózgertpese, bul aýmaq ıesinen tartylyp alynady, - dedi oblystyq jerdiń paıdalanylýy men qorǵalýyn baqylaý basqarmasynyń bólim basshysy Bolat Medeý.
Sondaı-aq sheneýnikter jýrnalıstermen birge Bestýjev 10/2 mekenjaıyndaǵy bos turǵan ýchaskige bardy. Bul jer 2010 jyldan beri satyp alý-satý negizinde jeke menshikke berilgen, sodan beri jeti jyl boıy qańyrap tur.
- Qazirgi ýaqytta bizdiń basqarma 18 nysanda baqylaý jumystaryn júrgizdi. Jalpy, oblysta jerdi maqsatty túrde paıdalanbaý boıynsha 26 fakt tirkeldi, onyń 20-sy qalaǵa tıesili. Toǵyz talap aryz sotqa jiberildi, onyń altaýy aýyl sharýashylyq aýmaqtarǵa tıesili bolsa, bireýi Ekibastuz ben ekeýi Pavlodarǵa qarasty, - dedi oblystyq jerdiń paıdalanylýy men qorǵalýyn baqylaý basqarmasynyń basshysy Seıitjan Jumashev.
Aıta keteıik, 2016 jyly mundaı sharalar negizinde qoldanylmaı jatqan 218 myń gektar jer memleketke qaıtaryldy. 100 myń gektar jer ıeleri óz aýmaqtaryn maqsatty túrde paıdalanýǵa kiristi.
Sondaı-aq, aýyl sharýashylyǵynyń aýmaqtarynda da turaqty túrde tekseris júrgiziledi. 340 myń gektar jerdi paıdalanbaǵan kásipkerlerge aıyppuldar salyndy. Onyń 25 mıllıon teńgesi tólendi.
