Pavlodarda zańsyz kómir satatyn birneshe oryn anyqtaldy
PAVLODAR.QazAqparat - Oblys ortalyǵynda ruqsatsyz kásipkerlikpen aınalysqan jáne belgilenbegen orynda kómir satqandarǵa eskertý jasalýda, dep habarlaıdy pavlodarnews.kz.
Qala ákiminiń orynbasary Aıan Beısekın kómir baǵasyn turaqtandyrý úshin arnaıy top jumys jasap jatqanyn atap ótti.
«Kómirdi zańsyz satýshylardy anyqtaý boıynsha arnaıy top jumys jasaýda. Zańsyz kásipkerlikpen aınalysýshylar ruqsat etilmegen jerlerde satýmen qatar, baǵalardy qymbattatýda»,- dedi Aıan Beısekın. Qazirgi ýaqytta arnaıy top qalany aralaýda. Onda qoǵamdyq uıymdar, jaýapty memlekettik organdardyń ókilderi bar. Toptyń negizgi tapsyrmasy - zań normalaryn túsindirý. Jergilikti polıtsııa qyzmeti jáne memlekettik kiris organdary ákimshilik aıyppul salýǵa quqyǵy bar. Jalpy, qalada kómir turaqty jetkizilýde. Jaǵdaı baqylaýda.
Kómir satýmen aınalysatyn arnaıy ruqsaty bar «Elıt KZ» JShS dırektory Dastan Dáýletbaev satyp alýshylardyń azaıǵanyn aıtady. - Bazamyzda kómir qory jetkilikti. Maıkóbeniń tonnasy - 12 myń teńge, qaraǵandylyq Shubarkól - 17 myń teńge bolsa, Qarajyra - 13 myń teńgeden. Qyrkúıek pen qazan aıynda kelýshiler kóbeıedi. Búginde uzyn-sonar kezek joq. Qazirgi ýaqytta kúnine 20-30 mashına keledi. Byltyr osy ýaqyttarda kúnine 60-70 mashına bolatyn. Ne sebepti azaıyp qalǵanyn bilmeımiz», - dedi Dastan Dáletbaev.
Arnaıy toptyń kezekti reıdinde Sývorov kóshesinde ruqsatsyz kómir satatyn 3 kólikti anyqtady.
Reıdtik shara barysynda Sývorov kóshesinde ruqsatsyz kómir satyp turǵan 3 kólik anyqtaldy. «Mundaı jaǵdaı QR Ákimshilik kodeksiniń 204-baby boıynsha ruqsat etilmegen jerde saýda jasaý bolyp qarastyrylady. Birinshi retke eskertý berdik. Ekinshi ret ustalǵan jaǵdaıda 10 AEK kóleminde aıyppul salynady»,-deıdi Pavlodar qalasy ІІB jergilikti polıtsııa qyzmeti basshysynyń orynbasary, polıtsııa maıory Murat Kozkın.
