Pavlodarda zańǵa baǵynbaǵan kásipkerlerden jalǵa alǵan jeri qaıtaryp alynady
Óńirlik kommýnıkatsııalar qyzmetinde ótken baspasóz brıfınginde belgili bolǵandaı, buǵan qyr jerlerdegi shópten shyqqan órttiń ormanǵa ulasýy sebep boldy. Aımaqtaǵy jer qoınaýyn paıdalaný, qorshaǵan orta jáne sý resýrstary basqarmasy basshysynyń orynbasary Saǵyn Tóleýtaev bıyl ormanǵa qaýip tóndirgen 30 dala órti oryn alǵanyn aıtty.
«Onyń ishinde 21 órt Ertis ózeniniń alqabynda oryn aldy. Kóbinese sharýa qojalyqtarynyń eski shópti jaǵýy órttiń shyǵýyna sebep bolyp jatady. Mundaı dala órtterin sóndirý jergilikti ákimdikterdiń jáne sol jerdi paıdalanýshylardyń moınynda. Eriktiler men órt sóndirý beketterin paıdalanady. Al, biz sol daladaǵy órt ormanǵa ótpeýi úshin baryp kómektesemiz», - dedi Saǵyn Tóleýtaev.
Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev bıyl 7 orman órti tirkelgenin jáne onyń bári dala órtinen jalǵasyp kelgenin atap ótti.
«Negizi Ertis ózeniniń alqabynda qurǵaq shópti órteýge tyıym salynǵan. Al, qyrda sharýalar eger jalǵa alǵan jeri ormanmen shektesse, shópti órteýden bir táýlik buryn orman qorǵaý qyzmetine eskertýi tıis. Ol sharaǵa jaýapty tulǵany taǵaıyndaýy kerek. Sondaı-aq órteıtin ár ýchaskesi 25 gektardan aspaýy qajet. Eger 100 gektary bolsa, 25 gektardan 4-ke bólgeni jón. Órtep bolǵan soń 3 saǵat baqylap, qaıta tutanbaıtynyna kóz jetkizgeni durys. Órteıtin aýmaǵynyń shetinen 8 metr jer jyrtý talap etiledi. Ókinishke oraı, sharýalar ketetin shyǵyndy oılap, bul talapty oryndamaıdy», - dedi Rýslan Tólepbaev.
Oblys ákiminiń orynbasary Meıram Óteshov jalǵa alǵan jerlerin baqylaı almaıtyndardan jer qaıtaryp alynatynyn málimdedi.
«Aýyl sharýashylyǵynyń qoldanysyndaǵy jerdi ne úshin órteıdi? Oǵan memleket jalǵa jer bergen. Ol shópti shappaıdy da, kóktemde jaqsy shóp shyǵý úshin eski shópti órteıdi. Biz endi montorıng jasaımyz. Ásirese, Ertis alqabyndaǵy jerdi qatań baqylaımyz. Sosyn jerdi zańǵa sáıkes qaıtaryp alamyz. Árıne, biz birden ala almaımyz. Birinshi jyl eskertemiz. Eger ol shara qoldanbasa, ekinshi jyly qaıtaryp alamyz. Al, daladaǵy órt ormanǵa ulasqan kásipkerler jerdi jaldaý kelesimshartynyń talaptaryn buzdy. Olar óz jerin baqylamaǵan. Sondyqtan jer qaıtarylady», - dedi Meıram Óteshov.
Onyń aıtýynsha, qaı jerge kim jaýapty ekenin bilý úshin jerdi jalǵa alyp otyrǵandardyń tizimi orman qorǵaý qyzmetine beriledi. Keıde sharýa qojalyqtary óz jerinde órt bolyp jatqanyn bilmeıdi. Sondaı jaǵdaıda eskertilip, olar da órtti sóndirýge atsalysýy tıis.
Aıta keteıik, 2020-2021 jyldary jalǵa alǵan jerlerinde ýaqytyly shóp shappaǵan 5 kásipkerden jer qaıtaryp alynǵan.
