Pavlodarda Vorýshın saıabaǵyn kóriktendirýge 315 mln teńge qarjy bólindi - B. Baqaýov
PAVLODAR. QazAqparat - Pavlodarda Vorýshın saıabaǵyn kóriktendirýge Eýrazııalyq Top (ERG) kompanııasynyń demeýshiliginiń arqasynda 315,295 mln teńge qarjy bólindi.
Bul týraly búgin aımaq basshysy Bolat Baqaýov jalpy oblystyq senbilik barysynda málim etti, dep habarlaıdy pavlodarnews.kz. «Bıylǵy jyly Vorýshın saıabaǵynda jóndeý jumystaryn aıaqtaýdy kózdep otyrmyz. Demalys ornynyń janynda "Qazaqstan Allıýmınııi" jáne "Qazaqstan elektrolız zaýyty" kásiporyndarynyń jumyskerleri úshin 210 páterlik turǵyn úı salý josparda bar. Bul maqsatta qarajat qarastyrylyp qoıǵan. Alaıda aldymen turǵyndardyń arasynda qoǵamdyq tyńdaý ótkizip, halyqtyń pikiri eskeriletin bolady», - dedi B. Baqaýov. Munda 12,5 gektar aýmaqta arhıtektýralyq shaǵyn nysandar ornalastyrylyp, dekoratıvtik brýschatka tóselgen jáne velosıpedpen júrýge arnalǵan joldar, vorkaýt, basketbol, fýtbol alańdary salynady. Sonymen qatar, 55 kólik qoıatyn turaq ashylyp, sý jáne elektr júıeleri tartylady. Eske sala keteıik, Vorýshın saıabaǵyn abattandyrý boıynsha jobalyq smetalyq qujattama ázirlenip, jobany júzege asyrý úshin demeýshiler izdestirile bastaǵan. Turǵyndarǵa demalys ornyn qurý tujyrymdamasy aıasynda 35 aýmaqty kóriktendirý josparlanǵan. Buǵan qosa, ótken jyly Gagarın saıabaǵy men Bekturov kóshesi boıyndaǵy Lermontovtan Qaıyrbaev kóshesine deıingi skver qalypqa keltirildi. Gagarın saıabaǵyn jóndeý jumystary memlekettik jeke menshik seriktestik esebinen júrgizildi.
