Pavlodarda voleıboldan áıelder arasynda Qazaqstan chempıonatynyń úshinshi týry bastaldy

ASTANA. KAZINFORM – Pavlodar qalasynda voleıboldan áıelderdiń Ulttyq lıga komandalary arasynda HHHІІ Qazaqstan chempıonatynyń úshinshi týry ótip jatyr.

«Baıantaý» sport kesheninde týrnır kestesinde kósh bastap kele jatqan «Qýanysh» (SQO) pen «Aıqarakóz» (Taldyqorǵan) komandalary alǵashqy bolyp alańǵa shyqty.

Munda soltústikqazaqstandyqtar qarsylastaryn 3:0 (25:8, 25:21, 25:9) esebimen ońaı utyp, upaı sanyn 35-ke jetkizdi.

Degenmen qalǵan komandalar da «Qýanyshty» alysqa uzatqysy kelmeıtini anyq. Ortalyq kezdesýde óskemendik «Berel» «Almatyny» 3:0 (29:27, 25:23, 25:21) esebimen tize búktirip, 33 upaımen ekinshi orynda keledi.

El chempıony bolǵanymen, barlyq beldi oıynshylary ketip, tek jastarmen jasaqtalǵan «Altaı» (Óskemen) komandasyn 3:0 (25:15, 25:15, 25:23) esebimen tize búktirgen «Qaraǵandy» osy maýsymdaǵy alǵashqy jeńisine qol jetkizdi.

Pavlodardyń «Ertisin» óz alańynda oınaǵanyna qaramastan, 3:0 (25:10, 25:20, 25:20) esebimen san soqtyrǵan «Jetisý» (Taldyqorǵan) 25 upaı jınap, tórtinshi satydaǵy «Almatyny» qýyp jetti.

Seısenbi kúni ortalyq matchtar «Qýanysh» - «Berel» jáne «Jetisý» - «Turan» (Túrkistan) arasynda ótedi.

Úshinshi týr oıyndary 29 qańtarda máresine jetedi.

Eske sala keteıik, budan buryn Oralda voleıboldan erler arasynda Qazaqstan chempıonatynyń úshinshi týr oıyndary aıaqtalǵanyn jazǵan bolatynbyz.