Pavlodarda VII qysqy Ýnıversıadanyń ashylý saltanaty ótti
PAVLODAR. QazAqparat - «Astana» muz saraıynda QR VII qysqy Ýnıversıadasynyń ashylý saltanaty ótti. Toǵyz sport túrinen jarysqa túsetin stýdentter Pavlodar men Şýchınsk qalalarynda baq synaıdy, dep habarlaıdy QazAqparat pavlodarnews.kz-ke silteme jasap
Bıyl pavlodarlyq Ýnıversıada rekordtyq kórsetkishke ıe bolyp otyr. Sebebi, baıraqty básekege elimizdiń 36 joǵarǵy oqý ornynan 2 myńǵa jýyq sportshy kelgen. Buǵan deıingi jarystarda qatysýshylar sany 900-den artqan emes.
«Búgin Ertis óńirinde aıtýly mereke bolyp jatyr. Osynshama delegatsııany qarsy alý biz úshin úlken abyroı. Elbasymyz sportqa kóp kóńil bóledi. Óńirimizde sporttyq ǵımarattar jetkilikti. Jastar úshin barlyq jaǵdaı jasalǵan. Shýaqty mereke qarsańynda bárińizge densaýlyq pen sáttilik tileımin», - dedi aımaq basshysy Bolat Baqaýov.
Ońtústik Koreıada ótken XXIII qysqy Olımpıada oıyndarynyń qatysýshysy, shańǵyshy Anna Shevchenko atap ótkendeı, ol týǵan qalasyndaǵy iri jarysqa alǵash ret qatysýda. «Biz búgin birinshi jarys jolyn júrip óttik, kún óte sýyq, - deıdi HHVIIІ qysqy Ýnıversıadanyń rekordyn ornatqan sportshy. - Mundaı aýa raıyna boı úıretip úlgermedik. Pavlodar aıazymen qarsy aldy. Erteń jylynady degen úmittemin. Pavlodarda men alǵash ret iri saıysqa qatysyp otyrmyn. Olımpıadadan kele sala ýaqyt tapqanyma qýanyshtymyn. Osy sátti paıdalanyp, oqý ordamnyń namysyn qoldan bermeýge tyrysamyn».
Aıta keteıik, Anna Shevchenko Qazaq sport jáne týrızm akademııasynyń magıstranty.
