Pavlodarda veterınarııa basqarmasynyń burynǵy basshysy sottaldy

PAVLODAR. KAZINFORM - Laýazymdy tulǵa qyzmet babyn asyra paıdalanyp, zańsyz jolmen bıýdjet aqshasyn jymqyrǵan.

Pavlodar oblysy veterınarııa basqarmasynyń burynǵy basshysy Aıdar Ývalıev memlekettik satyp alý konkýrstarynan aqsha jymqyrýdyń túrli aıla-sharǵylaryn oılap tapqan. Ekibastuzdyń aýyldyq aımaǵyndaǵy mal qorymdaryn tazalaý qyzmetin oılap taýyp, oınatylǵan konkýrsta jalǵan fırma jeńip shyqqan. Sóıtip tenderden utyp alǵan qarajattan Ývalıevtiń shotyna 1,5 mln teńge aýdarǵan. Fırma tazalyq jumysymen aınalyspaǵan, ony jergilikti veterınarlar atqaryp kelgen. Ol bul qarajatqa nesıesin japtym dep aqtalǵan.

Al sheneýnikke taǵylǵan taǵy bir aıyp — ol qaramaǵyndaǵylarǵa syıaqy jazyp berip, onyń jartysyn ózi alyp otyrǵan. Osylaısha 780 myń zańsyz tabys tapqan.
Atalǵan derekter boıynsha A.Ývalıevke qatysty qylmystyq iz qozǵalǵan bolatyn.

Pavlodar qalasynyń qylmystyq ister jónindegi aýdanaralyq soty óńirlik veterınarııa basqarmasynyń burynǵy basshysy Aıdar Ývalıevke qatysty qozǵalǵan qylmystyq istiń núktesin qoıdy. 

— Aıdar Ývalıev QR Qylmystyq kodeksiniń 361-baby, 1-bóligi boıynsha kináli dep tanyldy jáne bir jylǵa bas bostandyǵyn shekteý jazasy taǵaıyndaldy. Ári ol memlekettik qyzmette eńbek etý quqyǵynan ómir boıyna aıryldy, - dep habarlady qalalyq sottan.

Eske sala keteıik, Pavlodarda sheneýnikter baspana qurylysyna bólingen 350 mln teńgeni «súrge saqtap» qoıǵan.