Pavlodarda velosıpedke mingesken zeınetker áıel qorshaýǵa soǵylyp kóz jumdy

PAVLODAR. KAZINFORM - Polıtsııa jazataıym oqıǵa boıynsha tekserý júrgizip jatyr. Tórt dóńgelekti velosıped jalǵa alynǵan bolyp shyqty.

Pavlodardyń ortalyq jaǵalaýynda qaıǵyly jaǵdaı boldy. Tórt dóńgelekti velosıpedke anasyn jáne úsh balasyn mingizip alǵan áıel adam tómenge túsý kezinde temir qorshaýǵa soǵylǵan.

- Oqıǵa 7 shildege qaraǵan túni ortalyq jaǵalaýda bolǵan. Jaǵajaıdaǵy joldar arqyly tómenge túsý kezinde áıel rýlge ıe bola almaı, metall qorshaýǵa soqtyǵysqan. Oqıǵa saldarynan zeınetker áıel alǵan jaraqattarynan qaıtys boldy. Onyń qyzy men nemereleri aýrýhanaǵa jetkizildi, - dep habarlady Pavlodar oblysy Polıtsııa departamentiniń baspasóz qyzmetinen.

Atalǵan aýmaq túngi ýaqytta qarańǵy bolǵany aıtylady. Ol jerde velosıped júrýine ruqsat berilgen, tyıym salý belgileri joq. Al velosıpedtiń ózi jalǵa alynǵan eken. Qazir polıtsııa kisi ólimine soqtyrǵan jazataıym oqıǵa boıynsha tekserý jumystaryn júrgizip jatyr.

Óńirlik jedel járdem stansasynyń baspasóz qyzmeti oqıǵa boıynsha 6 shilde saǵat 23.08-de shaqyrtý túskenin málimdedi.

- Jedel járdem brıgadasy oqıǵa ornyna 6 mınýtta jetti. Ókinishke qaraı, bizdiń qyzmetkerler 69 jastaǵy áıeldiń sol jerde kóz jumǵanyn anyqtady. Zardap shekken 2010, 2015, 2018 jylǵy qyz balalar oblystyq balalar aýrýhanasyna, sondaı-aq 39 jasar áıel adam Pavlodar qalalyq №1 aýrýhanasyna jetkizildi, - dep habarlady jedel járdem stansasynan.

Eske sala keteıik, Pavlodarda balkon terezesinen qulaǵan 6 jasar bala kóz jumdy.