Pavlodarda valıýtalyq zańnamany buzǵan kompanııaǵa 1,5 mlrd teńge aıyppul salyndy
PAVLODAR. KAZINFORM — Óńirlik memlekettik kirister departamentiniń málimetinshe, kompanııa sheteldik ónim jetkizýshige 16 mıllıon dollardan astam qarajat aýdarǵan. Alaıda oǵan satyp alynǵan taýar elge kirmegen. Al aqsha keri qaıtarylmaǵan.
Pavlodar oblysy boıynsha memlekettik kirister departamenti tarıftik retteý basqarmasynyń qyzmetkerleri syrtqy ekonomıkalyq kelisimshart sheńberinde aqshalaı qarajatty repatrıatsııalaý jónindegi mindettemelerdiń oryndalmaýyna baılanysty iri quqyq buzýshylyqty anyqtady.
— Otandyq kompanııa Qytaı Halyq Respýblıkasynyń jetkizýshisimen kelisimshart jasasqan. Shart talaptaryn oryndaý aıasynda beırezıdenttiń mekenjaıyna 16 337 281 AQSh dollary (balamasy — 7 681 299 403 teńge) aýdarylǵan. Alaıda taýar Qazaqstan Respýblıkasynyń aýmaǵyna jetkizilmegen, al valıýtalyq qarajat zańda belgilengen merzimde qaıtarylmaǵan.
Tekserý barysynda qarjylyq operatsııalardy uıym basshylyǵy tarapynan tıisti baqylaýdyń bolmaýynan mekemeniń esepshisi júrgizgeni anyqtaldy, — dep málimdedi departamentten.
Qazaqstan Respýblıkasynyń zańnamasyna sáıkes, valıýtalyq normalardyń saqtalýy boıynsha jaýapkershilik, qyzmetkerlerdiń qaısysy naqty operatsııalardy jasaǵanyna qaramastan tikeleı zańdy tulǵaǵa júkteledi.
— Іs materıaldaryn qaraý nátıjesi boıynsha kompanııa ákimshilik jaýapkershilikke tartyldy. Salynǵan aıyppul somasy 1,5 mlrd teńgeden asty. Bul Pavlodar oblysyndaǵy valıýtalyq zańnamany buzǵany úshin qoldanylǵan eń iri sanktsııalardyń biri boldy, — dep qosty departament ókilderi.
Mamandar syrtqy ekonomıkalyq qyzmetke qatysýshylarǵa syrtqy saýda kelisimsharttarynyń oryndalýyn tıisinshe baqylaý qajettigin eskertip otyr. Bıznes úshin taýarlardyń ýaqtyly jetkizilýin nemese oryndalmaǵan mindettemeler boıynsha aqshalaı qarajattyń qaıtarylýyn qamtamasyz etý mańyzdy. Zańnama talaptaryn saqtamaý ákimshilik jaýapkershilik pen qarjylyq shyǵyndarǵa ákep soǵady.
Buǵan deıin Túrkistanda valıýtalyq zańnamany buzǵan kásiporyn 175,9 mln teńge aıyppul tóleıtinin habarlaǵanbyz.
