Pavlodarda vaktsına almaǵan qyzmet kórsetý salasyndaǵylarǵa aıyppul salynady
PAVLODAR. QazAqparat – Pavlodar oblysynda vaktsına almaǵan qyzmet kórsetý uıymdary men jumyskerlerine aıyppul salynady, dep habarlaıdy QazAqparat Pavlodarnewskz-ke silteme jasap.
Bul týraly onlaın ótken baspasóz jıynynda Pavlodar oblysynyń sanıtarlyq-epıdemıologııalyq baqylaý departamentiniń basshysy Batyrbek Álıev málim etti.
- KVI-diń odan ári taralýynyń aldyn alý úshin 1 shildededen bastap elimizdiń Bas sanıtarlyq dárigeriniń qaýlysy shyqty. Qaýly boıynsha qyzmet kórsetý salasydaǵylar vaktsına qabyldaýǵa mindetteldi. 15 shildege deıin vaktsınanyń 1-komponentimen, 15 tamyzǵa deıin 2-komponentimen egilýi tıis, - dedi Batyrbek Álıev.
Aıta keteıik, elimizdiń Bas sanıtarlyq dárigeriniń qaýlysyna sáıkes HQKO, saýda úıleri jáne ózge de qyzmet kórsetý salasy uıymdarynyń qyzmetkerlerine vaktsına egilý mindetteldi. Óıtkeni, bul salanyń mamandary adamdarmen jıi baılanysqa shyǵady.
Vaktsına egilýden qarsy kórsetkishteri bar jáne sońǵy 3 aıda KVI-men aýyrǵandar bosatylady.
- Vaktsına qabyldamaǵandarǵa aıyppul salynady. Bul ákimshilik quqyq buzýshylyq kodeksi boıynsha qarastyrylady. Jeke adamdarǵa 5 aılyq eseptik kórsetkish mólsherinde, al, uıymdarǵa salynatyn aıyppul 500 AEK mólsherine deıin jetedi, - dedi Batyrbek Álıev.
Qyzmetkerlerdiń vaktsına qabyldaýy boıynsha ár uıymnyń qyzmetkerlerdi basqarý bólimi esep júrgizedi.
- Biz qaı uıymda qansha adam jumys jasaıtynyn bilmeımiz. Sondyqtan oblysta qyzmet kórsetý salasynyń qansha adamy egilý kerektigi belgisiz. Biraq óńirde kúnine 3000-3500 adam KVI-ge qarsy vaktsına egilýi tıis degen talap bar. Keshegi kúni 4 myńnan astam adam vaktsına aldy, - dedi Batyrbek Álıev.
Oblystyń bas sanıtarlyq dárigeriniń aıtýynsha, qyzmet kórsetý salasynyń mekemelerindegi vaktsınalaýǵa baılanysty monıtorıng toptary tekserý júrgizýi múmkin.
