Pavlodarda uıaly telefonnan shyqqan órtten qyzdyń basy kúıip qaldy
PAVLODAR. QazAqparat - Pavlodarda telefonnan shyqqan órtten qyzdyń basyn kúıik shaldy.Tilsiz jaý jatyn bólmeni tolyq sharpyǵan, dep habarlaıdy Pavlodarnews.kz.
Oblystyq tótenshe jaǵdaılar departamentiniń málimdeýinshe, oqıǵa 19 tamyz kúni saǵat 10:20-da Nurkın kóshesi, 116 mekenjaıyndaǵy 2 qabatty turǵyn úıde oryn alǵan.
«Ekinshi qabattaǵy páterdiń jatyn bólmesinde órt shyǵyp, úı zattary men jıhazdar janǵan. Jalyn 20 sharshy metr aýmaqty sharpydy. Saǵat 11:00-de órt tolyǵymen joıyldy. Oqıǵa ornynan 2002 jyly týǵan qyz aýrýhanaǵa jetkizildi. Qyzdyń basyn 30 paıyz kúıik shalǵan» , - dedi qalalyq TJ basqarmasynyń basshysy m.a. Tilekjan Galıamov.
Departamenttiń habarlaýynsha, órttiń shyǵýyna elektr quraldaryn qoldaný kezinde órt qaýipsizdigi erejesin buzý sebep bolǵan. «Zardap shekken qyz uıyqtap qalǵan. Uıaly telefony qýattaý kózine qosylyp, tósekte jatqan. Shyqqan órtten aldymen matras janǵan» , - dedi departamentte.
Oqıǵa ornyna órt sóndirýshi jeke quramnyń 16 adam men 5 tehnıkasy, medıtsınalyq kómektiń 3 adam men 1 tehnıkasy jumyldyryldy.
