Pavlodarda úı janýarlaryn qydyrtatyn oryndar bolady
PAVLODAR. QazAqparat - Pavlodar qalasynda úı janýarlaryn serýendetýge arnalǵan alty oryn bekitildi, dep habarlaıdy QazAqparat pavlodarnews.kz saıtyna silteme jasap.
Qala ákiminiń baspasóz qyzmetinen málim etkendeı, janýarlardyń serýen alańdarynyń qurylysy qyrkúıek aıynda bastalady.
«Alty orynnyń ishine Hımqalashyǵy shaǵyn aýdanynda Aımanov kóshesi, 40 mekenjaıyndaǵy úıge qarama-qarsy temirjol boıynda, HQKO-nyń qasynda Pavlov kóshesindegi №19 mekteptiń qorshaýy boıymen Kırov kóshesine deıingi aımaq bar. Sonymen qatar, Sátbaev, 253, Chkalov, 18, Sývorov, 25 jáne Kataev,31 mekenjaılary engizilgen», - dedi ákimniń baspasóz hatshysy Gúljan Ábsalyqova.
Qazirgi ýaqytta atalǵan ýchaskelerdi Pavlodar qalasynyń turǵyn úı-kommýnaldyq sharýashylyǵynyń ıeligine ótkizý boıynsha qujattar daıyndalyp jatyr.
«Jer ýchaskelerine qatysty jumys tolyqtaı aıaqtalǵan soń bıýdjettik komıssııaǵa qarajat bólý úshin ótinim jiberiledi. Itterdi qydyrtýǵa arnalǵan mekenjaılar jumys komıssııasynyń otyrysynda qarastyrylǵan bolatyn», - dedi vedomstvodan.
Dese de, bul habardy estigen Lomov, 30 jáne Sátbaev, 253 úıleriniń turǵyndary tańǵalyp otyr. Bul jaǵdaıǵa qatysty olar Instagram jelisindegi @pvlnews paraqshasynda óz pikirlerin jazdy.
«Biz bul habardy estip, tańǵalyp otyrmyz. Aýlada balalarǵa arnalǵan alańnyń ornyna búkil aýdannan keletin ıtterdi qydyrtatyn alań salǵaly otyr», - dep jazǵan.
Qala ákimdiginde osyǵan qatysty túsinik berdi.
«Sátbaev kóshesi, 253 mekenjaıy Pavlodar qalasynyń dene shynyqtyrý jáne sport bólimimen usynylyp otyr. Bul aımaq qaraýsyz qalǵan jáne osynda fýtbol alańyn qurý josparda joq. Sondaı-aq, dál osy aýlada ıtterge arnalǵan alań ornatý týraly qalalyq máslıhatqa V.Sholohov atty azamattan ótinim túsken bolatyn», - dedi vedomstvodan.
