Pavlodarda úı qustarynyń neden qyrylyp qalǵany áli de anyqtalǵan joq

PAVLODAR. KAZINFORM - Mamandardyń aıtýynsha, qazirgi ýaqytta úı qustarynyń qyrylýy toqtaǵan. Ólgen qustardyń jalpy sany 2,5 myńǵa jýyq.

Qustardyń jappaı ólýi 5 aýdandy qamtyp, 7 eldi mekende tirkelgen. Mamandar qustardyń ólekselerinen patologııalyq materıal alyp, zerthanaǵa jibergen. Alǵashqyda joǵary patogendi qus tumaýy taralýy múmkin degen kúdik bolǵan. https://kaz.inform.kz/news/pavlodar-aymaginda-zhogari-patogend-kus-tumaui-taralui-mumkn-veterinar-maman-3fc9b9/
Alaıda Astanadaǵy zerthana yqtımal dertti rastamady.

- Oblystyq veterınarııa qyzmeti úı qustarynan potologııalyq materıaldar alyp, Astanaǵa zerthanaǵa jibergen bolatyn. Biz qus tumaýyna kúdik týdyryp, tekseriske jibergen edik. Biraq, ol rastalmady. Qazirgi tańda aýrýdyń sebebi áli de anyqtalyp jatyr. Úı qustary jappaı qyrylyp jatqanda jabaıy qustardyń jyly jaqqa ushýy bastalǵany málim. Іndet solardan juǵýy múmkin. Respýblıkalyq zerthanadan mamandar kelip, ólgen jabaıy qustardan da potologııalyq materıal alyndy. Búgingi tańda ol da tekserilip jatyr, -deıdi óńirlik veterınarııa basqarmasynyń basshysy Asyltas Tileýbaev.

Mamandardyń sózinshe, eger elordalyq zerthana «joǵary patogendi qus tumaýy» dıagnozyn rastaǵanda, shyǵyn respýblıkalyq bıýdjet esebinen óteletin edi. Sondyqtan ótemaqy máselesi ázirshe sheshilmegen. Joǵaryda atalǵan jeti aýylda jalpy sany 2484 úı qusy ólim-jitimge ushyraǵan.

Eske sala keteıik, Pavlodar óńirinde belgisiz indetten 1,5 myńǵa jýyq úı qusy qyrylyp qaldy.