Pavlodarda úı qustarynyń qyrylýy áli de tirkelip jatyr

PAVLODAR. KAZINFORM — Qazirgi ýaqytta ólgen qustardyń sany 2 256 basqa jetti. Olardan alynǵan synamalardyń zerthanalyq nátıjesi áli shyqpaǵan.

Pavlodar oblysy veterınarııa basqarmasynyń málimetinshe, óńirdiń 5 aýdanynda úı qustarynyń qyrylýy tyıylmaı tur.

— 2025 jylǵy 3 qyrkúıek pen 8 qazan aralyǵynda Pavlodar oblysyndaǵy 8 eldi mekende ornalasqan 44 jeke aýlada qustardyń ólimi tirkeldi. Ólgen qustardyń jalpy sany — 2 256 bas. Epızootııalyq jaǵdaı Aqtoǵaı (Shilikti aýyly), Sharbaqty (Orlovka aýyly), Jelezın (Jańajuldyz, Tserkovnoe aýyldary), Tereńkól (Jańaqurylys aýyly, Qorjynkól aýyly, Altaı aýyly) jáne Ertis aýdanynda (Severnoe aýyly) qalyptasyp otyr, — dep habarlady basqarmadan.

Ólgen qustardan patologııalyq materıaldar iriktep alynyp, Astana qalasynyń «Veterınarııa jónindegi ulttyq referenttik ortalyǵyna» jiberilgen. Materıaldar «Joǵary patogendi qus tumaýy», «Nıýkasl aýrýy» jáne pasterellez ben salmonellez dertteri boıynsha zerttelip jatyr.

Buǵan deıin Pavlodar óńirinde belgisiz indetten 1,5 myńǵa jýyq úı qusy qyrylyp qalǵany týraly jazǵanbyz. 

Keıin veterınarlar Pavlodar aımaǵynda joǵary patogendi qus tumaýy taralýy múmkin ekenin aıtty.