Pavlodarda úskirik aıazǵa baılanysty baspanasy joq adamdar anyqtalyp jatyr
PAVLODAR. KAZINFORM - Óńirde úskirik aıazǵa baılanysty turǵylyqty jeri joq azamattar anyqtalyp, áleýmettik ortalyqqa jetkizilip jatyr. Adamdar munda ýaqytsha jatar orynmen, 3 mezgil ystyq tamaqpen qamtylady.
Pavlodarda qutqarýshylar men polıtseıler basynda baspanasy joq adamdardy aıazdy kúnderi úsikten aman alyp qalýdyń amalyna kiristi. Birlesken reıd nátıjesinde ondaǵan azamat arnaıy áleýmettik ortalyqqa aparyp ornalastyryldy.
- Kóshe kezip júretinder sýyq kúnderi jylý qubyrlaryna, káriz qudyqtaryna túsip boı jylytady nemese bos turǵan ǵımarattarǵa kirip ot jaǵady. Keı jaǵdaıda olardy úsik shalyp, sońy qaıǵyly jaǵdaımen aıaqtalyp jatady. Álgindeı yqtımal jaıttardyń aldyn alý maqsatynda birlesken reıdter uıymdastyryp jatyrmyz. Sońǵy ret 12 adamdy izdep taýyp, baspanasy joq azamattardy qabyldaıtyn arnaıy ortalyqqa ákelip tapsyrdyq, - deıdi Pavlodar qalasy Tótenshe jaǵdaılar basqarmasy bastyǵynyń orynbasary Tilekjan Galıamov.
Kúnniń sýytýyna baılanysty ortalyqqa óz betimen júginip jatqan adamdar da bar. 150 orynǵa eseptelgen ortalyqta qazir 140 adam turyp jatyr. Mamandar barlyq kelýshige qajetti áleýmettik qoldaý kórsetiletinin aıtady. Munda adamdar ýaqytsha jatar orynmen qamtylyp, 3 mezgil ystyq tamaq beriledi.
Eske sala keteıik, qańtar aıynyń sońynda Pavlodarda 41 gradýsqa deıin aıaz bolady.