Pavlodarda úshem dúnıege keldi

PAVLODAR. QazAqparat – Pavlodar qalasynyń turǵyny Aıgúlim Qabıdenova oblystyq perınataldyq ortalyqta úsh sábıdi dúnıege ákeldi, dep habarlaıdy QazAqparat Pavlodarnews.kz saıtyna silteme jasap.

Qyzdardyń esimi – Amına, Karıma, uldyń aty – Álimjan. Árqaısysynyń salmaǵy 2 keliden astam, boıy – 47,48,49 sm.

«Árıne, barlyǵy Allanyń qalaýymen bolady ǵoı. Bul - Allanyń bizge bergen teńdessiz syıy. Sábılerdiń deni saý, aman bolsyn. Kelinimiz úlken batyldyq tanytty. Júktilik kezinde de kóńilimizdi taýyp, jaǵdaıymyzdy jasap, úıdiń berekesin keltirip júrdi. Balalar aıy-kúni tolyq jetip dúnıege keldi. Qýanyshymyzda shek joq», - deıdi shaqalaqtardyń ájesi Aǵaısha Sháripova.

Úshemniń ákesi Rymbek Qabıdenovty quttyqtaýǵa áriptesteri - «AMANAT» partııasy Pavlodar oblystyq fılıalynyń atqarýshy hatshysy Ilıa Terenchenko bastaǵan ujym keldi.

«Partııa «Baqytty otbasy» mańyzdy áleýmettik jobasyn júzege asyrýda. Endi mine, áriptesimizdiń otbasynda tórt bala bar. Bul – úlken qýanysh jáne sonymen birge úlken jaýapkershilik. Balalardyń bolashaǵy jarqyn bolsyn!», - dedi Ilıa Terenchenko.

Densaýlyq saqtaý basqarmasynyń málimetinshe, bul - bıyl Pavlodar oblysynda dúnıege kelgen úshinshi úshem.