Pavlodarda úsh memlekettiń azamattyǵymen júrgen áıel elden shyǵaryldy

PAVLODAR. QazAqparat - Pavlodar oblysy Jelezın aýdandyq soty Qazaqstan zańnamasyn buzǵan Reseı jáne Kanada azamatshasy M-ǵa qatysty isti qarady, dep habarlaıdy QazAqparat.

«Qazaqstan azamattyǵy týraly» Zańnyń 21-babyna sáıkes, eger adam basqa memlekettiń azamattyǵyn alǵan bolsa, osy eldegi azamattyǵyn joǵaltady.

Sonymen qatar, Qazaqstan azamaty sanalatyn jáne shet memlekettiń azamattyǵyn qabyldaǵan adam ózge azamattyqty alǵan kúninen bastap kúntizbelik otyz kún ishinde Qazaqstannyń ishki ister organdaryna nemese shet elderdegi mekemelerine habarlaýǵa mindetti. Sondaı-aq ol pasportyn jáne jeke kýáligin tapsyrýǵa tıis.

23 sáýirde Úrlitóbe shekara beketinde tekserý barysynda zańnamamen belgilengen merzimde shetel azamattyǵyn alǵanyn habarlamaǵan Reseı Federatsııasynyń jáne Kanada Respýblıkasynyń azamatshysy M. anyqtaldy.

Sot otyrysynda jaýapqa tartylatyn tulǵa kinásin tolyq moıyndap, 2017 jyldyń qarasha aıynda Kanadanyń azamattyǵyn, sonymen birge aǵymdaǵy jyldyń naýryzynda RF azamattyǵyn alǵanyn, biraq zańdy bilmegendikten Qazaqstan pasportyn tapsyrmaǵanyn túsindirdi.

Sonymen qatar, Qazaqstanda týysqandary bolmaýyna baılanysty elden shyǵarýdy surady.

Sot qaýlysymen azamatsha M. ÁQBtK 496-baby 2-bólimi boıynsha kináli dep tanylyp, Qazaqstan aýmaǵynan ákimshilik jolmen shyǵaryp jiberý jazasy taǵaıyndaldy.

Qaýly zańdy kúshine endi.