Pavlodarda úsh balasyna 7 mln teńgege jýyq alıment tólemegen áıel jaýapqa tartyldy
PAVLODAR. KAZINFORM — Pavlodar qalasynda úsh balasyn tıesili alımentti birneshe jyl boıy tólemegen áıel anyqtaldy. Onyń bereshegi 6 mıllıon 936 myń teńgege jetken.
Óńirlik polıtsııa departamentiniń málimetinshe, alıment tóleýden jaltarǵan áıelge izdeý jarııalanyp, polıtseıler onyń júrgen jerin anyqtaǵan.
— Birneshe jyl boıy alıment tólemegen boryshkerge qatysty ákimshilik materıal toltyrylyp, sottyń qaraýyna joldandy. Sot sheshimimen áıelge 20 saǵat qoǵamdyq jumysqa tartý jazasy taǵaıyndalǵan. Sonymen qatar oǵan sot sheshimin oryndaý úshin úsh aı merzim berildi, — dep habarlardy polıtsııa departamentinen.
Tártip saqshylarynyń aıtýynsha, eger osy ýaqyt ishinde áıel alıment tóleýden qaıta jaltarsa, oǵan qatysty qylmystyq jaýapkershilik máselesi qaralady.
Quqyq qorǵaý organdary qarjylyq qıyndyqtarǵa tap bolǵan azamattardy alıment tóleýden jaltarmaı, máseleni zań aıasynda sheshýge shaqyrady. Ol úshin sotqa nemese sot oryndaýshylaryna júginý qajet.
Eske sala keteıik, Jambyl oblysynda 8,6 mln teńge alıment qaryzy múlikpen óteldi.
