Pavlodarda urylar bir jylda 163 mln teńgeniń múlkin qoldy etken
PAVLODAR. KAZINFORM - Jalpy jyl basynan páter tonaýdyń 66 deregi tirkelse, onyń 50-in polıtseıler izin sýytpaı ashqan.
Arnaıy taldaýlar páter urlyǵy kóbine jazǵy ýaqytta jasalatynyn kórsetip otyr. Sondaı-aq qylmys jaǵdaılarynyń 70%-y kúndizgi ýaqytta, ıaǵnı úı ıeleri bolmaǵan kezeńde órbıdi. Páter urlyǵynyń shamamen 30%-y bir táýlik ishinde ashylady. Tonaýshylar kóbine aqshany, altyn zergerlik buıymdardy, tsıfrlyq jáne turmystyq tehnıkalardy alyp ketedi.
- 2025 jyldyń 11 aıynyń qorytyndysy boıynsha oblys aýmaǵynda páter urlyǵynyń 66 deregi tirkeldi. Onyń ishinde 50 qylmys ashyldy. Jasalǵan qylmystar saldarynan turǵyndarǵa keltirilgen jalpy materıaldyq shyǵyn - 163 mıllıon teńge boldy, - dep habarlady óńirlik polıtsııa departamenti krımınaldyq polıtsııa basqarmasynyń bastyǵy Balǵabaı Qaparov Kazinform tilshisine.
Páter urlyǵy QR Qylmystyq kodeksiniń 188-baby 3-bóligi boıynsha saralanady. ıAǵnı urlyq jasap ustalǵandarǵa 2 jyldan 7 jylǵa deıingi merzimge bas bostandyǵyn shekteý nemese bas bostandyǵynan aıyrý jazasy taǵaıyndalýy múmkin. Túrmege qamalǵan jaǵdaıda dúnıe-múlki tárkilenedi.
- Keıingi 3 jylda oblys aýmaǵynda páter urlyǵynyń tómendeý dınamıkasy baıqalady. Máselen, 2023 jyly – 111, 2024 jyly – 82, bıyl 66 derek tirkeldi. ıAǵnı qylmystyq derekter 40%-ǵa azaıǵan, - deıdi Balǵabaı Qaparov.
Tártip saqshylary páterińizdi tonaýshylardan qorǵaýdyń eń qarapaıym joly – saqtyq sharalaryn kúsheıtý ekenin aıtady. Úıden shyqpas buryn syrtqy esikterdiń, terezelerdiń jáne balkonnyń jabyq ekenin tekserińiz. Esikke eki nemese odan da kóp qulyp ornatqanyńyz abzal. Kiltterdi ózgeler úshin qoljetimdi bolatyn jerge qaldyrmańyz. Terezelerge, jeke úılerdiń balkondaryna temir tor qoıyp, úı ishine múmkindiginshe qaýipsizdik dabyly men qaýipsizdik kameralaryn ornatý da mańyzdy.
Eske sala keteıik, Petropavl turǵyny zergerlik sheberhanany tonap, artynan órt qoıǵan.