Pavlodarda Ýnıversıada men Azıada júldegerlerine bir mıllıon teńgeden berildi
ASTANA. QazAqparat - Pavlodar qalasynyń ákimdigi ǵımaratynda XXVIII Ýnıversıada oıyndary men VIII qysqy Azıada oıyndarynyń júldegerlerin marapattaý rásimi ótti, dep habarlaıdy pavlodarnews.kz.
Shahar basshysy Nurjan Áshimbetovpen birge atalmysh sharaǵa shańǵyshy Anna Shevchenko men Irına Bykova, bıatlonshylar Darıa Ýsanova, Maksım Braýn, Anton Pantov pen olardyń bapkerleri qatysty.
- Ýnıversıada men Azıada - asa mańyzdy halyqaralyq báıgelerdiń biri. Oǵan qatysýdyń ózine úlken qaırat pen tabandylyq qajet. Aldaǵy ýaqytta sizderdi XXIII qysqy Olımpıada oıyndary kútip tur. Pavlodarlyqtar qashan da álemdik jarystarda joǵary óner kórsetetin. Qala turǵyndary men ákimdiktiń, depýtattardyń atynan sportshylarymyzǵa bir mıllıon teńgeden, al, bapkerlerine 500 myń teńgeden syıaqy usynamyz, - dedi Nurjan Áshimbetov.
Qala ákiminiń aıtýynsha, búgin ákimdikte joǵary nátıjege qol jetkizgen bapkerler men sportshylardy marapattaý úshin qosymsha bes mıllıon teńge bólingen.
- Bizge qoldaý bergenderińiz úshin jáne búgingi ótkizgen kezdesýlerińizge rahmet aıtqym keledi. Biz osylaı qala men eldiń abyroıyn asyryp júrgenimizdi maqtan tutamyz, - dedi Darıa Ýsanova.
Eske salaıyq, Anna Shevchenko Ýnıversıada oıyndarynda bes márte jeńis tuǵyryna kóterilgen. Irına Bykova atalmysh jarystyń bir kúmis júldesin taqymdasa, Darıa Ýsanova Ýnıversıadanyń bir kúmis medalimen qatar Azıada oıyndarynyń altyny men qolasyn qanjyǵasyna baılaǵan. Anton Pantov joǵaryda atalǵan eki jarystyń da kúmisin qolǵa túsirip, Azııada oıyndarynyń qola medalin de utyp alǵan. Al, Maksım Braýn Azıadanyń altynyn jeńip aldy.
