Pavlodarda Ýnıversıada alaýy qurmetine ótken gala-kontsertti 3000 kórermen tamashalady

ASTANA.QazAqparat - Pavlodardaǵy «Astana» muz saraıynda ótken kontsertke Rin'Go toby men lazerli shoý ártisteri kelip óner kórsetti, dep habarlaıdy pavlodarnews.kz.

Muz saraıynda alaýdy ustap júgirgen sportshylardy 3000-nan asa kórermen kútip aldy.  Sahnaǵa kóterilgen Rin'Go tobynyń bir ókili taıaqqa súıenip shyqty, biraq, syrqatyna qaramastan ózge ánshilermen birdeı án shyrqady. Budan keıin kórermender lazerli shoýdy tamashalady.

«Búgin biz álemdegi aýqymdy sharalardyń birin kórip qana qoımaı, onyń qatysýshysy atanyp otyrmyz. Alaýdy ustap ótken ár azamat elimizdiń maqtaýǵa laıyqty tulǵasy dep bilemin», - dedi oblys ákimi Bolat Baqaýov.

XXVIII búkilálemdik qysqy Ýnıversıada Almaty qalasynda 29 qańtar men 8 aqpan aralyǵynda ótedi. Atalmysh qysqy oıyndar arasynda medaldar sporttyń 12 túri boıynsha sarapqa salynady.