Pavlodarda ýly gazdy anyqtaıtyn qurylǵynyń arqasynda kópbalaly otbasy aman qaldy
PAVLODAR. QazAqparat - Aqqýly aýdanynyń Sharbaqty aýylynda turatyn kópbalaly otbasynda ýly gazdy anyqtaıtyn qurylǵy ornatýdyń nátıjesinde qaıǵyly jaǵdaıǵa tosqaýyl qoıyldy, dep habarlaıdy QazAqparat pavlodarnews.kz agenttigine silteme jasap.
Bes bala tárbıelep otyrǵan jalǵyzbasty ana Bıbigúl Seıtimova keshki saǵat 21.30-22.00 shamasynda ádettegideı pesh jaǵyp, balalardy uıyqtatýǵa qamdanyp jatqan. Kenetten qabyrǵada ilýli turǵan qurylǵy dabyl qaǵyp, peshtiń jalynan tútin shyǵa bastaǵan. Dereý balalardy dalaǵa shyǵarǵan ana úıdiń esik-terezesin jeldetýge kirisken.
«Qalaǵa barsam da, basqa jerge shyqsam da bes balamdy birdeı alyp júre almaımyn, - deıdi Bıbigúl Seıtimova. - Astanadaǵy bes qaıǵyly oqıǵadan keıin balalardy jalǵyz qaldyrýǵa da qorqatyn boldym. Ýly gazdyń aldyn alatyn qurylǵy ornatylǵannan keıin janym tynysh tapty. Úlken qyzyma qurylǵy dabyl qaqsa, tez arada dalaǵa shyǵyp, jaqynda ornalasqan meshitke baryńdar dep eskertip qoıdym».
4 aqpan kúni aýdandyq tótenshe jaǵdaılar bóliminiń basshysy Rınat Karkınbaev pen aýdandyq órt bóliminiń qyzmetkerleri Aqqýly, Sharbaqty jáne Jambyl aýyldaryndaǵy kópbalaly úılerdi aralap, qaıyrymdylyq aktsııasy sheńberinde ýly gazdy anyqtaıtyn qurylǵy ornatyp bergen. Ajal aýzynan aman qalǵan ana aýdandyq tótenshe jaǵdaılar bóliminiń basshylyǵyna alǵysyn bildirip, qaýipsizdik maqsatynda árbir úıge osyndaı qurylǵy qajet ekenin aıtady.
Eske sala keteıik, bıyl jergilikti bıýdjet esebinen 840 myń teńgege az qamtamasyz etilgen 25 kópbalaly otbasynyń úılerine jóndeý jumystary júrgiziledi. Qazirgi tańda aýdanda 461 kóp balaly otbasy turady. Aıta keterligi, Qazaqstan elektrolız zaýyty Pavlodar oblysynyń turǵyndary úshin 125 dana ýly gazdan qorǵaıtyn qurylǵy bólgen. Onyń 25-i Ekibastuz qalasy turǵyndarynyń úılerine, qalǵandary oblystyń jeti aýyldyq eldimekenderindegi úılerge ornatylady.
