Pavlodarda «Uly Dala órnegi» kórmesi ashyldy
Qala turǵyndary men qonaqtary bul kórmeni 2018 jyldyń 14 qańtaryna deıin tamshalaıtyn bolady, dep habarlaıdy pavlodarnews.kz .
Óserbaı Amanjoluly Shoranov 1952 jyly 15 qazanda Pavlodar oblysynyń Grıaznovka (qazirgi Mámaıt Omarov) aýylynda dúnıege kelgen. Sýretshi bilimin Almatydaǵy N.V.Gogol atyndaǵy kórkemsýret ýchılışesinde jetildirgen. Ol tanymal keskindemeshi, QR Eńbegi sińgen óner qaıratkeri Muhıt Kalımov, daryndy sýretshi, QR Eńbegi sińgen óner qaıratkeri Marıs Hıtahýnov jáne Kórkemsýret akademııasynyń akademıgi, halyqaralyq synshylar men ónertanýshylar qaýymdastyǵynyń múshesi, QR Memlekettik syılyǵynyń ıegeri Amandos Akanaevtan tálim alǵan. Óz shyǵarmashylyǵyna belsendilikpen sergek qaraıtyn Óserbaı Shoranov únemi Qazaqstannyń túkpir-túkpirinde ótetin sýretshiler plenerinde jumys isteıdi. Baıanaýyl, Býrabaı, Kókshetaý men Astana, Qyzylorda, Semeı, Shymkent, Atyraý óńirlerinde jyl saıyn uıymdastyrylatyn respýblıkalyq, halyqaralyq plenerlerde áriptesterimen birge tabıǵat aıasyna shyǵý, eńbek etý sýretshiniń ómirlik ustanymyna aınalǵan. Árıne, plenerlik jumysta dala kelbetin sýretteý - týǵan jerge degen úlken súıispenshiliktiń bir aıǵaǵy. Kórme qylqalam sheberiniń 65 jas mereıtoıyna arnalǵan. Sýretshi Óserbaı Amanjoluly «Uly Dala órnegi» atty bul kórmesine qazaq jerine tán ádemi peızajdaryn, dala tylsymyn áserli boıaýmen shynaıy jetkize bilgen. Keń jazıra dalanyń ásem kelbetin, syr-sıpatyn berý arqyly elimizdiń tabıǵatyn súıispenshilikpen beıneleıdi. Onyń shyǵarmashylyq tuǵyry san alýandyǵymen erekshelenedi. Kórmege 100-den asa keskindeme janrynda oryndalǵan týyndy usynylyp otyr. Qylqalam sheberi peızaj, portret jáne taqyryptyq sýretter baǵytynda jumys jasaıdy. Jeke shyǵarmashylyq stıli men taqyryptyq sheshimderine názik ulttyq naqysh tán.
