Pavlodarda Ulttyq ulannyń qyzmettik ıti joǵalǵan eki qyzdy izdep tapty
PAVLODAR. KAZINFORM - Pavlodar qalasynda 14 jastaǵy qyz túnde úıine oralmaǵan soń, anasy polıtsııaǵa habarlasqan. Ol qurbysymen shahar shetine shyǵyp ketkeni belgili boldy.
Jasóspirimniń inisi ápkesiniń úıden ydys-aıaq alyp shyqqanyn baıqaǵan. Beınebaqylaý jazbalaryn teksergen tártip saqshylary qyzdyń qurbysymen birge Pavlodar aýylyna qaraı bet alǵanyn anyqtady. Alaıda keıin olardyń qaıda baǵyt túzegeni belgisiz bolyp shyqty.
Al kelesi kúni izdestirý jumystaryna Ulttyq ulannyń 5512 áskerı bóliminiń kınology serjant Aslan Shýataev tartyldy. Áskerı qyzmetshi aldymen ata-anasynan qyzdardyń kıimderin alyp, ıisshil malınýa tuqymdas «Major» esimdi ıtpen qala shetindegi aýylda izdeý júrgizgen.
- Iisshil ıt kınologty shaharǵa irgeles jatqan aımaqtaǵy demalys oryndaryna, keıin dúkenge apardy. Satýshy eki qyzdyń dúkenge kirip, balta satyp alǵanyn rastady. Odan keıin tórt aıaqty jaýynger Ertis ózeni jaǵalaýyn tintip, kórshiles kóshedegi aıaldamaǵa jol bastaıdy. Aıaldama taıaǵan sátte kınolog eki qyzdyń avtobýsqa otyrǵanyn baıqap, dereý jedel topqa habar berdi. Polıtsııa qoǵamdyq kólikti toqtatyp, jasóspirimderdi ata-anasyna tabystady,-dep habarlady «Shyǵys» óńirlik qolbasshylyǵynyń baspasóz qyzmetinen.
Qyzdardyń ata-anasy jedel áreket etken áskerı qyzmetshige alǵysyn bildirdi. Serjant Shýataev buǵan deıin Almaty oblysyndaǵy Baltabaı aýylynda úı tonaǵan urylardyń izine túsip, olardy jasyrynǵan nysannan taýyp alǵan bolatyn.
Eske sala keteıik, ShQO-da taýǵa jıdek terýge shyǵyp, joǵalyp ketken qarııa tabyldy.