Pavlodarda Ulttyq ulannyń qarý-jaraǵy men áskerı tehnıkasy tekserildi

PAVLODAR. KAZINFORM - Pavlodar qalasynda Ulttyq ulannyń áskerı tehnıkasy men qarý-jaraǵynyń jaýyngerlik ázirlikteri pysyqtaldy.

Josparly tehnıkalyq baıqaý 5512 jáne 6679 áskerı bólimderinde ótti. Áskerı qyzmetshiler bul sharaǵa tyńǵylyqty daıyndalǵan. Baıqaýǵa arnaıy maqsattaǵy bólimshelerdiń tehnıkasy, jeke quramdy tasymaldaýǵa arnalǵan joǵary ótimdi kólikter, sondaı-aq qoǵamdyq tártip pen qalanyń qaýipsizdigin qamtamasyz etýge baǵyttalǵan arnaıy avtokólikter tartyldy.

– Jyl saıynǵy tehnıkalyq baıqaýdyń basty maqsaty – áskerı tehnıkany sapaly daıyndap, bólimshelerdiń jaýyngerlik daıyndyǵyn joǵarǵy deńgeıde ustaý. Patrýldik qyzmetke arnalǵan avtokólikterdiń, sondaı-aq qarý-jaraq pen oq-dárilerdiń tehnıkalyq jaǵdaıy jan-jaqty tekseriledi. Ulttyq ulan áskerı bólimderiniń jaýyngerlik ázirligi kóbine tehnıkanyń jeke quramdy belgilengen jerge ýaqtyly jetkizýine tikeleı baılanysty, – deıdi «Shyǵys» óńirlik qolbasshylyǵy qolbasshysynyń tehnıka jáne qarý-jaraq jónindegi orynbasary, polkovnık Azamat Ǵabdýllın.

Tekserý qorytyndysy boıynsha barlyq áskerı tehnıka sapaly kúıde jáne kez kelgen tapsyrmany oryndaýǵa tolyq daıyn ekeni belgili boldy. Sonymen qatar, ofıtserler men júrgizýshilerdiń de daıyndyq deńgeıi nazardan tys qalmaıdy.

Aıta keteıik, mundaı is-sharalar Ulttyq ulannyń «Shyǵys» óńirlik qolbasshylyǵyna qarasty barlyq áskerı bólimderde jyl saıyn ótkiziledi.

Eske sala keteıik, qazaqstandyq áskerı qyzmetshi AQSh-ta rekord ornatty.