Pavlodarda Ulttyq ulan orkestri ǵasyr jasaǵan soǵys ardagerine mereke syılady
PAVLODAR. KAZINFORM — Marııa Matıýshına keler jyldyń qańtar aıynda 100 jasqa keledi. Ol nebári 16 jasynda óz erkimen suranyp, maıdandyq kýrsqa jazylady da soǵysqa attanyp kete barǵan.
«Shyǵys» óńirlik qolbasshylyǵyna qarasty 6679 áskerı bóliminiń áskerı qyzmetshileri Uly Otan soǵysynyń ardageri Marııa Matıýshına turatyn úı aýlasynda orkestrmen kontsert qoıdy.
Soǵys jyldary aıtylǵan áýezdi ánderdi shyrqap, erlikti sıpattaıtyn orkestrlik shyǵarmalardy oryndady.
Qarııa ulandyqtardyń ónerine rızashylyǵyn bildirip, batasyn berdi.
— Bizdiń búgingi basty mindetimiz ári paryzymyz — Uly Otan soǵysy ardagerleriniń árqaısysyna qamqorlyq kórsetý, olardyń erlikteri úshin sheksiz alǵysymyzdy bildirý. Sondyqtan áskerı bólim orkestri de qarııanyń kóńilin aýlap, boıyn sergitý maqsatynda soǵys jyldaryndaǵy áýezdi ánderden popýrrı oryndady. Biz soǵys ardagerleriniń úılerine baryp, jaǵdaıyn surap turamyz, — deıdi 6679 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary, maıor Nazbek Málikov.
Marııa Alekseevna 1926 jyly 19 qańtarda jumysshy otbasynda dúnıege kelgen.
1942 jyly on alty jasar boıjetken Novomoskovsk qalasyna tájirıbege kelip, ata-anasynan jasyryn túrde áskerı maskırovka kýrstaryna erikti bolyp jazylady. Keıin maıdanǵa alynyp, qorǵanys qurylysy basqarmasynyń 225-shi quramynda, 104-shi áskerı qurylys jasaǵynyń sapynda Belarýssııaǵa deıin jetedi. Ardager jeńisti Fınlıandııa shekarasynda qarsy alǵan. Surapyl soǵys aıaqtalǵannan keıin turmys quryp, úsh ul men bir qyz tárbıelep ósiredi. Keıýananyń 11 nemeresi, 29 shóberesi, 3 shópshegi bar.
Eske sala keteıik, Ekinshi dúnıejúzilik soǵys ardagerlerine Jeńistiń 80 jyldyǵy medali beriledi.