Pavlodarda ulttyq qaýipsizdik qyzmeti ardageriniń atyna kóshe berildi

PAVLODAR. KAZINFORM - Oblys ortalyǵyndaǵy Ýrıtskıı kóshesi budan bylaı Ulttyq qaýipsizdik qyzmetiniń ardageri Úkimet Smaǵulovtyń esimimen atalady. Ol uzaq jyldar boıy elimizdiń qaýipsizdik salasynda eńbek etip, general-maıor dárejesine deıin jetti.

Kósheniń ashylý saltanatyna Úkimet Smaǵulovtyń kózin kórgen ardagerler jınaldy. Olar tulǵanyń qyzmet etken jyldarǵy eńbegin, adamgershilik bolmysy týraly esteliktermen bólisti. Qaı ýaqyt bolmasyn eldiń tynyshtyǵy men qaýipsizdigin qorǵaý jaýapty is. Ardager sol qıyn joldan qaısar bolmys, tereń bilimimen óte bilgen jannyń biri.

Ú.Smaǵulov - KSRO qaýipsizdik qyzmetiniń qurmetti qyzmetkeri, Pavlodar oblysyndaǵy ulttyq qaýipsizdik komıtetin 16 jyl basqarǵan. Saladaǵy 45 jyl eńbek ótilinde eldiń qaýipsizdigin nyǵaıtýǵa eleýli úles qosty.

General-maıordyń qaryndasy Rahıla Smaǵulova bul ıgi is ol óz áýletteri úshin, aǵasynyń rýhy úshin úlken qurmet ekenin atap ótti.

Eske sala keteıik, buǵan deıin Skrıptonıttiń týǵan aýyly Atameken bolyp ózgerdi.