Pavlodarda ultymyzdyń ańyz dombyrashylary beınelengen sýretter kórmesi ótti
PAVLODAR. KAZINFORM -Ulttyq dombyra kúnine oraı Naǵymbek Nurmuhammedov atyndaǵy Pavlodar oblystyq kórkemsýret mýzeıi erekshe kórme uıymdastyrdy. Onda qazaq mýzyka mádenıetiniń tulǵalary keskindelgen kartınalar qoıyldy.
- Dombyra - tek ulttyq nyshan ǵana emes, halyqtyń únin ǵasyrlardan jetkizgen kıeli aspap. Kórmege keskindeme óneriniń kórnekti ókilderi - Toqbolat Toǵysbaev, Gúlfaırýs Ysmaıylova, Úki Ájıev, Moldahmet Kenbaev syndy sýretshilerdiń týyndylary qoıyldy. Olardyń eńbekterinde Qurmanǵazy, Dına Nurpeıisova, Kenen Ázirbaev sııaqty qazaq mýzyka mádenıetiniń ańyz tulǵalarynyń beınesi somdalǵan,-deıdi kórkemsýret mýzeıiniń basshysy Aqertis Soltanbaev.
Sondaı-aq kórmede qazirgi zaman sýretshileri - Nurjan Saýytbekov, Djalal Agaev, Aınabek Ospanov, Seısenhan Mahanbetov, Rýstam Hýdaıberganov jáne ózge de qylqalam sheberleriniń týyndylary usynyldy. Olar óz eńbekterinde Baıanaýyldyń tabıǵaty men kıeli oryndaryn, sondaı-aq qazaq bolmysyna tereń fılosofııalyq kózqarasty kórkem beınelegen.
Eske sala keteıik, Dombyra kúni el kóleminde 300-ge jýyq is-shara uıymdastyrylady.
