Pavlodarda ýchaskelik polıtseı aýyl turǵynyn alaıaqtardyń qaqpanynan qutqaryp qaldy

PAVLODAR. KAZINFORM - Qaskúnemder aýyl turǵynynyń atyna 30 mln teńge nesıe resimdegen. Tártip saqshysy qarajattyń ózge shottarǵa aýdarylýynyń aldyn aldy.

Tereńkól aýdany Altaı aýylynyń turǵyny Natalıa Dvınıanına aıdyń-kúnniń amanynda alaıaqtardyń qurbany bola jazdaǵan. Uıaly telefonyna 1414 biryńǵaı baılanys ortalyǵynan kelip túsken SMS-kodty áldekimderge aıtyp jiberip, sońynan san soǵyp qalǵan.

- Belgisiz bireýler ózderin poshta qyzmetkerleri dep telefon shalǵan edi. Meniń barlyq derekterimdi, turǵylyqty meken-jaıymdy atady jáne kýrermen hat jiberetinderin aıtty. Álgilerge senip, túsken kodty aıttym. Keıin poshtashyǵa qońyraý shalǵanymda olar eshqandaı poshtalyq jóneltilimniń joq ekenin jetkizdi. Ábden sasyp, bizdiń ýchaskelik polıtseı Rýstam Imanbaevqa habarlastym. Rýstam Nájimıdenuly birden qolushyn sozdy. Meniń atyma 30 mln teńge nesıe resimdelip úlgergen eken. Ol jedel túrde qarjy uıymdaryna habarlasyp, barlyq somany joıýǵa kómektesti, - deıdi Natalıa Dvınıana. 

Turǵyn bul oqıǵa týraly oblystyq polıtsııa departamentine beıneúndeý joldap, óz isiniń mamany Rýstam Imanbaevtyń atyna sheksiz rızashylyǵyn jetkizgen. 
Osylaısha ýchaskelik polıtseıdiń shıraqtyǵynyń arqasynda qarapaıym aýyl turǵyny alaıaqtardyń arbaýynan qutyldy.

Eske sala keteıik, «HAS» qarjy pıramıdasynyń negizin qalaýshylar alaıaqtyq úshin sottaldy.