Pavlodarda tuzdy kól jaǵasynda demalyp júrgen er adam ókpesi isinip kóz jumdy
PAVLODAR. KAZINFORM - 1960 jylǵy azamat Maraldy kóliniń jaǵajaıynda tynyqqan. Kenetten jaǵdaıy aýyrlaǵan ol jedel járdemmen aýrýhanaǵa jetkizilgen.
Bul týraly oblystyq jedel járdem stanstsııasynan habarlady.
- Sharbaqty aýdanynda er adam tuzdy kól jaǵasynda demalyp júrgen kezde ókpe isinýine ushyrap, úshinshi dárejeli komaǵa túsken. Alǵashqy kómekti oǵan jergilikti medıtsına qyzmetkerleri kórsetti. Keıin er adam jedel járdem brıgadasyna tapsyrylyp, aýdandyq aýrýhanaǵa jetkizildi. Ókinishke qaraı, naýqas qabyldaý bóliminde qaıtys boldy, - dep málimdedi jedel járdem stantsııasynan.
Jedel járdem qyzmetkerleri ótken demalys kúnderi sýǵa shomylyp júrip, jazataıym oqıǵaǵa tap bolǵan taǵy eki adamǵa kómek kórsetken. Máselen, Pavlodar qalasynda 15 jastaǵy qyz qutqarý stantsııasy mańynda ózenge tek aıaǵyn shaıý úshin kirgen. Alaıda qumǵa batyp ketip, tepe-teńdigin saqtaı almaı sýǵa qulaǵan. Abyroı bolǵanda qyz tez arada qutqarylyp, oblystyq balalar aýrýhanasyna jetkizilgen.
Al Baıanaýyldaǵy Sabyndykól kólinde 1950 jylǵy er adam shomylyp júrip sýǵa batyp kete jazdaǵan. Ony ózge azamattar sýdan shyǵaryp alǵan. Alǵashqy medıtsınalyq kómek kórsetilgennen keıin zardap shegýshi aýdandyq aýrýhanaǵa jetkizilgen.
Qazir aptap ystyqtan jurttyń kóbi sý jaǵalaı bastaǵan. Dárigerler sýǵa túsken kezdegi temperatýranyń kúrt ózgerýi saldarynan sozylmaly aýrýlar asqynýy nemese kenetten túıilý paıda bolýy múmkin ekenin eskertedi.
Sondaı-aq jabdyqtalmaǵan demalys oryndary men sý aıdyndarynyń túbi úlken qaýip tóndiredi. Turǵyndar óz densaýlyq jaǵdaıyn durys baǵalap, sý jaǵasyndaǵy demalysty alkogolmen ushtastyrmaýy, balalardy, sýda qaraýsyz qaldyrmaýy kerek.
Eske sala keteıik, Aqtóbede bir kúnde úsh adam sýǵa batyp ketti.
