Pavlodarda túrmeniń burynǵy qyzmetkerine para alǵany úshin 11,5 mln teńge aıyppul salyndy
PAVLODAR. KAZINFORM — № 45 túzeý mekemesiniń burynǵy qyzmetkeri birneshe ret para alǵany úshin sottaldy. Sot oǵan 11,55 mln teńge kóleminde aıyppul salǵan.
Sot materıaldaryna súıensek, sottalǵan azamat Pavlodardaǵy № 45 túzeý mekemesi bastyǵynyń kezekshi kómekshisi qyzmetin atqarǵan. 2025 jyldyń tamyzy men qarashasy aralyǵynda ol mekemede jazasyn ótep jatqan azamattan birneshe ret aqsha alǵan.
Tergeý barysynda anyqtalǵandaı, qyzmetker bastapqyda sottalǵan adamnan arnaıy kıimge baılanysty ony jaýapkershilikke tartpaý úshin aqsha talap etken. Keıin «qorǵan bolamyn» degen syltaýmen aqsha alǵan. Budan bólek, sottalǵan adamǵa telefondy kolonııa aýmaǵyna kirgizip bergeni úshin de syıaqy alǵan.
Jalpy alǵanda, burynǵy qyzmetker sottalǵan azamattan 330 myń teńge alǵany málim bolǵan.
Pavlodar qalasynyń qylmystyq ister jónindegi mamandandyrylǵan aýdanaralyq soty aıyptalýshyny QR Qylmystyq kodeksiniń 366-baby 3-bóliginiń 4-tarmaǵynda kózdelgen qylmystyq quqyq buzýshylyqty jasaǵany úshin kináli dep tanydy.
Sot úkimimen oǵan para somasynyń 35 eselengen mólsherinde, ıaǵnı 11 mln 550 myń teńge aıyppul taǵaıyndaldy. Sonymen qatar onyń múlki tárkilenedi.
Burynǵy kolonııa qyzmetkeri kinásin sotqa deıingi tergeý barysynda tolyq moıyndaǵan.
Sot úkimi zańdy kúshine engennen keıin aıyppuldy bir aı ishinde tóleýge mindetteldi. Sondaı-aq oǵan memlekettik qyzmette ómir boıy jumys isteýge tyıym salyndy.
Eske sala keteıik, Pavlodarda páterlerdi arzanǵa alyp beremin dep jurtty aldaǵan qyz úsh jylǵa bas bostandyǵynan aıyryldy.
