Pavlodarda túrmedegi beınekamerany qasaqana syndyrǵan azamatqa sot taǵy bir jyl qosyp berdi

PAVLODAR. KAZINFORM - Sottalýshy qaýipsizdigi ortasha túzeý mekemesinde jazasyn ótep jatqan. Aldyndaǵy qylmysy úshin ol 9 jylǵa bas bostandyǵynan aıyrylǵan.

Pavlodardaǵy №45 túzeý mekemesinde jazasyn ótep jatqan sottalýshy beınekameralardy qasaqana syndyrǵan.

- Memlekettik aıyptaýshynyń prıntsıpti pozıtsııasyna baılanysty sot QR Qylmystyq kodeksiniń 428-1-babynyń 1-bóligi (qylmystyq-atqarý júıesi mekemelerindegi, tergeý ızolıatorlaryndaǵy jáne ýaqytsha ustaý ızolıatorlaryndaǵy beınebaqylaý júıesin nemese onyń komponentterin qasaqana joıý nemese buzý) boıynsha sottalǵannyń kinásin dáleldedi. Sottalýshy aýyr qylmystar jasaǵany úshin jazasyn №45 mekemesinde (qaýipsizdigi ortasha) ótep jatqan. Biraq teris minez-qulyqpen erekshelenip, eki beınebaqylaý kamerasyn qasaqana syndyryp, belgilengen tártipti buzý maqsatynda áreket etti, – dep habarlady mekeme bastyǵynyń orynbasary, ádilet maıory Darhan Najmıdenov.

Sot kolonııa múlkin syndyrǵan azamatty kináli dep tanyp, oǵan bir jyl bas bostandyǵynan aıyrý jazasyn taǵaıyndady. Osyǵan baılanysty onyń qamaý merzimi uzartylyp, qaýipsizdik deńgeıi joǵary mekemege aýystyryldy. Buǵan deıin ol 9 jylǵa sottalǵany belgili bolyp otyr.

Eske sala keteıik, Ekibastuzda bala ólimine qatysty qylmystyq is qozǵaldy.