Pavlodarda týrıstik maýsymnyń ashylýy keıinge shegerildi

PAVLODAR. QazAqparat – Oblystaǵy epıdemıologııalyq jaǵdaıǵa baılanysty óńirdegi týrıstik maýsymnyń ashylýy 15 maýsymnan bastap belgisiz merzimge qaldyryldy. Týrıstik nysandardyń jumysy da áli bastalǵan joq. Bul týraly QazAqparat Týrızm jáne sportty damytý basqarmasyna silteme jasap habarlaıdy.

Pavlodar oblysynyń turǵyndary men qonaqtarynan jaǵdaıǵa túsinistikpen qaraýdy jáne demalys aımaqtary men halyq kóp jınalatyn oryndarǵa barmaýdy suraımyz.

Týrıstik maýsymnyń bastalǵany týraly aqparat qosymsha jarııalanatyn bolady.

Aıta ketsek, ótken aptada, 1 - 7 maýsym aralyǵynda Pavlodar oblysynda koronavırýs juqtyrǵan 76 adam tirkelip, naýqastardyń sany 36,7%-ǵa artty. Oblysta karantın sharalaryn jeńildetýdiń kelesi kezeńi juqtyrý qarqyny 5 paıyzǵa deıin tómendegende júzege asyrylady dep josparlanyp otyr.