Pavlodarda turǵyn úıden órt shyǵyp, 32 adam qaýipsiz jerge kóshirildi
PAVLODAR. QazAqparat – Aǵymdaǵy jyly 13 mamyrda Pavlodar qalasyndaǵy Kataev kóshesinde ornalasqan bes qabatty turǵyn úıden órt shyqty, dep habarlaıdy QazAqparat Pavlodar oblystyq Tótenshe jaǵdaılar departamentine silteme jasap.
Órt týraly habarlama saǵat 14:47-de kelip túsken. Úshinshi qabattaǵy bir bólmeli páter men balkonda úı jıhazdary, turmystyq tehnıka, kıimder órtendi. Jalyn tórtinshi jáne besinshi qabatta ornalasqan páterlerge tarap ketti. Tilsiz jaýmen kúreske №3 órt sóndirý bóliminiń qyzmetkerleri shyqqan. Qutqarýshylardyń órtti on bes mınýttyń ishinde sóndirdi. Gaz-tútinnen qorǵaý qyzmetkerleri otyz eki adamdy qaýipsiz jerge kóshirgen, onyń ishinde alty bala bar.
Pavlodar qalalyq Tótenshe jaǵdaılar basqarmasynyń bastyǵy Renat Valıshanovtiń málimdeýinshe, órttiń shyǵýyna salǵyrtyq sebep bolǵan.
«Jalyn 19 sharshy metr aýmaqty sharpyǵan. Qazirgi kezde órtten keltirilgen shyǵyn kólemi anyqtalýda», - dedi ol.
Oblystyq TJB bastyǵy qala men oblys turǵyndaryn órt qaýipsizdigi erejelerin, múlki men jaqyn adamdardy saqtaýǵa shaqyrdy. Sonymen birge, keshe Ekibastuz qalasynyń «Gornıak» baý sharýashylyǵyndaǵy saıajaı ýchaskesinde kirpishten salynǵan turǵyn úıdiń aǵash konstrýktsııalary tolyq órtenip, shatyry (36 sharshy metr) opyrylyp túsken. Órt týraly habarlama saǵat 18:07-de jetken. Oqıǵa ornyna kelgen órt sóndirý qyzmetkerleri jalyndy saǵat 18:57-de aýyzdyqtap, 19:45-te tolyq sóndirgen. Qazirgi kezde órttiń shyǵý sebepteri men shyǵyn kólemi anyqtalýda.
Ótken táýlikte oblys aýmaǵynda eki órt oqıǵasy tirkeldi. Pavlodar oblystyq Tótenshe jaǵdaılar departamenti qala turǵyndary men qonaqtaryn aımaqta órt oqıǵalary jıileıtin kezeńniń jaqyndaǵanyn eske salyp, qaýipsizdik erejelerin saqtaýǵa shaqyrady.
