Pavlodarda Turǵyn úı qurylys jınaq bankiniń 106 salymshysy «Nurly jol» baǵdarlamasymen páter aldy
ASTANA. QazAqparat - Turǵyn úı qurylys jınaq bankiniń («Báıterek» holdınginiń enshiles uıymy) salymshylary qonys toıyn toılaýda. «Nurly jol» baǵdarlamasynyń aıasynda 9 qabatty eki úı paıdalanýǵa berilip otyr. Bir sharshy metriniń baǵasy 140 000 teńgeni qurady. Baspanaǵa ıe bolý úshin bank klıentterine páter qunynyń 30%-na teń somany esep-shottarynda jınaý kerek. Jetpeıtin qarajatty TÚQJB jyldyq mólsherlemesi jeńildikti 5%-dy quraıtyn zaem túrinde beredi.
Jańa páter ıelerine kiltti oblys ákimi Bolat Baqaýov pen TÚQJB Pavlodar oblystyq fılıalynyń dırektory Talǵat Baıylov tapsyrdy.
- 100-den asa adam Turǵyn úı qurylys jınaq bankinde aqsha jınap, búgin mine óz páterlerine qol jetkizip otyr. Bul memlekettik qoldaýdyń, sonymen qatar salymshylardyń talap-eńbekteriniń arqasynda múmkin boldy. Olardyń barlyǵy kezinde depozıt ashyp, turaqty túrde aqsha salyp otyrdy. Qazir Turǵyn úı qurylys jınaq banki «Baspana» biryńǵaı tarıftik baǵdarlamasyn iske qosý arqyly bul isti burynǵydan da jeńilirek jáne tıimdirek ete tústi. Endi bank salymshylary qansha jyl aqsha jınap, qandaı paıyzben turǵyn úı zaemyn alatyndaryn ózderi sheshedi», - dep atap ótti Talǵat Baıylov.
Jańa úıge ıe bolǵan Nedılko otbasy baǵasy 8,4 mln teńge turatyn eki bólmeli páter úshin 6 jyl boıy aqsha jınaǵan. Osy ýaqyt ishinde barlyǵy 4,2 mln. teńgeniń basy quralǵan eken. Jetpeıtin somany Turǵyn úı qurylys jınaq banki 6 jylǵa turǵyn úı zaemy túrinde beredi. Nesıe boıynsha aı saıynǵy tólem shamamen 68 000 teńgeni quraıdy.
- Shynymdy aıtaıyn, úıge dep aqsha jınap júrgende ońaı bolǵan joq. Páter jaldadyq, eki balany asyraý kerek, bankke de aqsha salyp turdyq. Biraq biz jumystan qoryqpaımyz, eńbek etip, maqsat qoıyp, nyq senimmen ómir súrdik. Sebebi depozıt ashar aldynda esepteýler júrgizgen edik. Nátıjesinde basqa bankterden ıpoteka alsań, ústinen taǵy bir páterdiń baǵasyn qosyp tóleıtinińdi anyqtadyq. Eń tómen mólsherleme Turǵyn úı qurylys jınaq bankinde boldy, bul biz úshin mańyzdy edi, - deıdi bank salymshysy Natalıa Nedılko.
Qazirgi ýaqytta Pavlodar oblysynyń árbir 15-turǵyny úıge dep aqsha jınaıdy. Jınaq qorynyń jalpy somasy 21,6 mlrd teńgeni quraıdy. Olar úshin jaqyn ýaqytta Turǵyn úı qurylys jınaq bankiniń jelisi boıynsha qoljetimdi baǵamen taǵy 755 páter salynatyn bolady.
Sonymen qatar aımaqta «Nurly jer» baǵdarlamasynyń aıasynda jeke turǵyn úılerdiń qurylysy bastaldy. Qazir arnaıy osy joba úshin Pavlodarda, Aqsýda jáne Ekibastuzda 1 430 jer telimi bólinip otyr.
