Pavlodarda turǵyndardy bir aı boıy qorqytyp, aqsha talap etken alty adam ustaldy
ASTANA. KAZINFORM — Pavlodar oblysynda turǵyndardan kúsh qoldanamyz dep qorqytyp, aqsha talap etken degen kúdikpen alty adam ustaldy.
Polıtsııanyń málimetinshe, kúdiktiler bir aı boıy Pavlodar turǵyndarynan aqsha bopsalaǵan. Olar talap etilgen qarajatty bermegen jaǵdaıda kúsh qoldanatynyn jáne dene jaraqatyn salatynyn aıtyp qorqytqan.
Jedel-izdestirý sharalary barysynda kúdiktilerdiń jeke basy anyqtalyp, alty adam ustaldy. Olardyń beseýi ýaqytsha ustaý ızolıatoryna qamaldy.
– Bopsalaý faktileri boıynsha qylmystyq ister qozǵaldy. Qazirgi ýaqytta qajetti tergeý áreketteri júrgizilip, bolǵan oqıǵanyń barlyq mán-jaıy anyqtalyp, sondaı-aq ustalǵandardyń basqa da osyǵan uqsas qylmystarǵa qatysy bar-joǵy tekserilip jatyr, – dedi Pavlodar oblysy polıtsııa departamenti uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov.
Eske salaıyq, buǵan deıin Jambyl oblysynda júk kóligi júrgizýshilerin bopsalaǵan top ustalǵanyn habarlaǵan edik.
