Pavlodarda turǵyndardy 12 mln teńgege aldaǵan jıhaz jasaýshy sottaldy
PAVLODAR. KAZINFORM — Pavlodarda jıhaz jasaýǵa tapsyrys qabyldap, turǵyndardy 12 mln teńgege aldaǵan 39 jastaǵy er adam bas bostandyǵynan aıyryldy.
Sot otyrysynda anyqtalǵandaı, onyń qurbany bolǵandardyń sany 20-ǵa jýyqtaıdy.
Turǵyndar asúı jıhazy, shkaf jáne basqa da buıymdarǵa tapsyrys bergenimen, aqshasyn tólegen soń jıhazdaryn ala almaǵan. Kúdikti tapsyrys berýshilerden aldyn ala tólem retinde buıym qunynyń 70 paıyzyn, al keıbirinen tolyq somasyn alǵan. Qylmystyq is aıasynda keltirilgen jalpy shyǵyn 12 mln teńge.
Jábirlenýshilerdiń biri Elena Kabýsevanyń aıtýynsha, ol jıhaz jasatýǵa shamamen 1 mln teńge bergen. Al keıbir turǵyndar 300-400 myń teńgeden tólegen.
— Sot protsesi kezinde keıbir adamdarǵa aqshasyn tolyq qaıtardy. Alaıda kópshiligi qarajatyn áli alǵan joq. Birine aqshasynyń bir bóligin ǵana berse, endi birine múlde qaıtarmaǵan, — deıdi turǵyn.
Qylmystyq isti qaraǵan sot er adamnyń alaıaqtyq jasaǵany dáleldengen degen qorytyndyǵa keldi. Bastapqyda oǵan úsh jylǵa bas bostandyǵynan aıyrý jazasy taǵaıyndaldy.
Deıturǵanmen jańa Konstıtýtsııanyń qabyldanýyna baılanysty jarııalanǵan raqymshylyqty qoldaný nátıjesinde jaza merzimi 2 jyl 3 aıǵa deıin qysqartyldy.
— Keltirilgen zalaldyń basym bóligi ótelmegen. Osyǵan baılanysty sot bas bostandyǵynan aıyrý jazasyn taǵaıyndady. Degenmen jaza merzimi zańda kózdelgen eń tómengi shekke jaqyn, — dep túsindirdi Pavlodar qalasynyń qylmystyq ister jónindegi aýdanaralyq sotynyń sýdıasy Juldyz Tilegenova.
Sottalǵan azamat sot zalynda qamaýǵa alyndy. Sonymen qatar oǵan úsh jyl boıy jıhaz jasaýǵa baılanysty qyzmetpen aınalysýǵa tyıym salyndy.
Sot úkimi ázirshe zańdy kúshine engen joq.
Eske sala keteıik, Pavlodarda arzan ıpoteka rásimdeımin dep jurtty 80 mln teńgege aldaǵan jigit sottaldy.