Pavlodarda turǵyndar eliktiń laǵyn qutqaryp qaldy
PAVLODAR. KAZINFORM — Pavlodar oblysynda jol jıeginen eliktiń laǵyn qutqaryp, oǵan qamqorlyq tanytqan otbasynyń áreketi ormanshylardy súısintti.
Sharbaqty tasjolynyń boıynda, Galkın aýylynan oblys ortalyǵyna qaraı kele jatqan otbasy eliktiń kishkentaı tólin baıqap qalǵan. Olar jabaıy janýardy ózderimen birge ala ketip, ormanshylardyń qolyna tapsyrǵan.
— Otbasy músheleri birden «109» biryńǵaı baılanys ortalyǵyna habarlasqan. Ortalyq mamandary bul aqparatty Pavlodar orman sharýashylyǵynyń qyzmetkerlerine joldaǵan. Kóp uzamaı jetken orman sharýashylyǵynyń mamandary kishkentaı elikti óz jaýapkershilikterine aldy, — deıdi Pavlodar orman jáne janýarlar dúnıesin qorǵaý mekemesiniń basshysy Ajdar Júsipov.
Qazirgi ýaqytta ol arnaıy orynǵa ornalastyrylyp, baqylaýǵa alynǵan. Qajetti kútim jasalýda. Sıyrdyń jáne eshkiniń sútimen qorektendirilip jatyr.
Ormanshylar ony kúzge deıin baǵyp, odan soń Ertis ózeni jaıylmasyndaǵy elikterge aparyp qospaqshy.
Eliktiń laǵyn alǵash baıqap, qutqarýǵa sebepshi bolǵan otbasynyń múshesi — Adelıa esimdi qyz bala janýarǵa Tomı degen esim bergen.
Eske sala keteıik, Ertis ormanynda sırek kezdesetin tarǵaq qusy kózge tústi.
